Ka sorkar ka peit ïa ki jingdonkam ba hakhmat eh jong ki paidbah kampher la ki heh ne rit : Bah Sniawbhalang Dhar

Shillong, Naiwieng 07 : U Symbud Myntri Rangbah ka Jylla, u Bah Sniawbhalang Dhar, ha ka Sngi Palei u la ong ba ka Jaintia Hills ka la jan poi sha ka thong ha kaba ïadei bad ka jingïoh surok, bad ba ka sienjam kaba bud jong ka Sorkar ka long ban pynkylla ïa kane ka thaiñ sha kawei ka jaka kaba pawnam ha ka koit ka khiah, khnang ba ki paidbah kin ym donkam shuh ban leit sha bar jong ka jylla ban ïoh jingsumar.
Haba kren ha ka jingïalang kaba la long ha Thadlaskein C&RD Block, ha kaba u Myntri Rangbah ka Jylla, u Conrad K Sangma, u la buh ïa ki maw nongrim jong ki katto katne ki projek ha Jowai Constituency bad kawei ka projek ha Nartiang Constituency, u Bah Dhar u la ong ba tang khyndiat tylli ki shnong ha kane ka thaiñ kiba dang sah khlem jingïoh surok.
“Ha ka jylla baroh kawei, don palat 860 haduh 870 tylli ki shnong kiba dang khlem jingïoh surok. Na kine, tang 18 tylli ki shnong ki don ha ka thaiñ Jaintia Hills,” u la ong.
Shuh shuh u la ong ruh, “Ka Jaintia Hills ka don hynñiew tylli ki constituency bad ngi don ym duna ïa ka 10 haduh 11 tylli ki surok interstate. Ha kaba ïadei bad ka jingïoh surok, ngi la jan poi sha ka kyrdan kaba biang.”
U Bah Dhar u la ong ba ka jingtei ïa ki jingtei ha ka liang ka koit ka khiah ha kane ka thaiñ ka dang ïaid shakhmat ha ki bynta bapher bapher.
“Ngi la ïakren shaphang ka jingdonkam ban pynheh ïa ka CHC Ummulong,” u la ong. “Shen shen ngin pynheh ruh ïa ka Ialong Civil Hospital bad ngi dang trei ban wanrah ïa kawei ka Nursing College khnang ba ngin lah ban kyntiew ïa kane ka thaiñ kum ka Health Hub Centre, bad ba ngin ym donkam shuh ban leit shabar na ka bynta ka internship.”
U la ong ruh ba shen kin sa buh ïa u maw nongrim jong ka hospital kaba don 30 tylli jingthiah ha Mookyndur, kaba kot T.11 klur, ha u snem ban wan.
“Kane ka long namar ka jingpeit jngai jong ki nongïalam jong ka Jaintia Hills, namar ngi kwah ba ha kawei ka sngi wat ki nongpang kiba don ki jingpang kiba kham jur ruh kin lah ban ïoh jingsumar ha kine ki hospital,” la ong u Bah Dhar.
“Ngim lah ban leh ïa kine baroh ha kajuh ka por, namar don bun ki jingdonkam bad ki jingtei kiba donkam, kiba ngi kum ka Sorkar ngi pyrshang ban pynbeit bad pyndep suki pa suki katkum ka jingangnud jong ki paidbah. Ki briew kiba wan na ki longïing kiba duk, ha ka jaka ban leit jingleit sha NEIGRIHMS lane Supercare, kin lah ban ïoh ïa ki jingshakri ha ka koit ka khiah ha ka thaiñ jong ngi hi,” u la ong.
U Bah Dhar u la ong ba ki maw nongrim jong ki projek kiba la buh ha ka Sngi Palei kim dei tang ki dak jong ka jingpynbna.
“Ngi la buh ïa ki maw nongrim khnang ba ki paidbah kin tip ïa ki kam babha kiba ka Sorkar ka la leh,” u la ong da kaba bynrap. “Haba ngi ong maw nongrim, kam mut ba tang u maw. Ka long kaba shisha ba don ki projek kiba la sdang ban pyntreikam.”
U la ong ba dang don shibun kiwei pat ki projek kiba la buh kyrpang na ka bynta ka Jowai Constituency bad u la kyntu ïa ki paidbah ban ithuh bad ai jingïaroh ïa ka jingkiew shaphrang.
“Bun sien, ngi kum ki briew ngi long kiba klet ïa ka jingbha kaba ngi ïoh. Ngi tip tang ban beiñ ïa ka Sorkar bad ïa ki nongïalam, bad bunsien ki paidbah ki khapbrip ïa ki kam babha kiba ka Sorkar ka la leh,” u la ong.
“Ha kine ki phra snem ba la dep, ka roi ka par kaba kane ka Sorkar ka la wanrah ha baroh ar tylli ki distrik kata ha East bad West Jaintia Hills ka la pynlong ïa kane ka thaiñ ban long kaba la jan biang lut ha ki jingdonkam,” u la ong. “Ha ka koit ka khiah, ka bording, ka jingïalehkai sports bad ki surok, nga sngew sarong ban ïathuh ïa phi ba ngi dang ïaid shakhmat.”
U la ai khublei ïa ki Myntri bad ki MLA kiba mynshwa bad kiba mynta kiba la noh synñiang sha kane ka jingkiew shaphrang.
“Ngi don baroh 2.50 lak ngut ki nongthep vote. Namar ba ka jingbun briew jong ngi ka kham rit, kum ka thaiñ ngi pynpaw ïa ka jingsngewnguh ïa ka Sorkar,” u la ong.
U la kdew kyrpang ruh ïa ka projek surok four-lane kaba thymmai (Greenfield Four-Lane Project), kaba kot T.21,000 klur, kaba sdang na Ri-Bhoi lyngba ka Jaintia Hills haduh Ratacherra, kaba la mynjur dang shen da u Myntri Rangbahduh ka ri.
“Ka projek kaba ym pat ju jia mynno mynno ruh ha ki jylla shatei lammihngi jong ka ri, kaba u Myntri Rangbahduh ka ri u la dep mynjur bad kaba un sa buh ïa u maw nongrim shen, ka dei ka Greenfield Project, ka surok fourlane kaba sdang na Ri-Bhoi, kaba ïaid lyngba ka baroh kawei ka thaiñ Jaintia Hills haduh Ratacherra,” u la ong. “Ka jingjrong jong ka ka long 166 kilomitar bad 80 percent ka hap hapoh ka thaiñ Jaintia Hills. To ngin ai jingïaroh ïa u Myntri Rangbahduh ka ri.”
Haba jubab halor ka jingkynthoh ba ka Sorkar ka pynleit jingmut tang ha ki projek heh, u Bah Dhar u la ong ba ka roi ka par ka shong ha ki jingdonkam jong ki paidbah.
“Don ki seng saiñ pyrthei kiba beiñ ïa kum kine ki kam pynroi, da kaba kylli balei ba kane ka Sorkar ka pynleit jingmut tang ha ki projek heh,” u la ong. “Hynrei ngan ïathuh ïa phi ba ka Sorkar kam jied tang ïa ki projek heh lane tang ïa ki projek barit. Ka shong pura ha ka jingdonkam bad ka jingkwah jong ki paidbah.”
“Lada lah ban pyndep ïa kane ka projek surok fourlane hapoh lai haduh saw snem, phi dei ban sngewthuh ïa ka jingmyntoi kaba ki paidbah kin ïoh,” u la ong. “Ha ka jaka ban shim por hynriew kynta ban leit na Khliehriat sha Guwahati, kane ka surok kan pynlyngkot ïa ka por da shiteng, kata tang lai kynta. Kan pynsangeh ïa ka jinglut por, ka bor bad kiei kiei baroh.”