Pynbna u Khalid Jamil ïa ka kynhun kaba don 23-ngut na ka bynta ka jingïalehkai paralok bad ka New Zealand

NEW DELHI, Naiwieng 07: U head coach jong ka kynhun phutbol ba la rangbah jong ka ri India u Khalid Jamil, ha ka sngi Thohdieng u la jer kyrteng ïa ka thup ki 23-ngut ki nongïalehkai na ka bynta ki ar tylli ki jingïalehkai paralok pyrshah ïa ka New Zealand ha kane ka FIFA International Match Window jong u bnai Naiwieng.
Ka India kan ïakhun pyrshah ïa ka New Zealand ha ka 12 tarik Naiwieng ha Go Media Stadium ha Auckland ha ka por 11:30 baje mynmiet, bad ha ka 15 tarik Naiwieng ha One New Zealand Stadium ha Christchurch ha ka por 08:30 baje janmiet.
Kane ka kynhun kaba don 23 ngut ka kynthup ruh ïa lai ngut ki nongïalehkai kiba la shah jied ha ka kynhun jong u Naushad Moosa ha ka SAFF Championship 2026 — u Bijoy Varghese, u Muhammad Suhail bad u Liston Colaco. Baroh lai ngut kin nym bteng shuh ïa katei ka lympung ha Dhaka bad ha jaka kata kin pynïasoh bad ka kynhun ïalehkai jong u Jamil ka ban leit sha New Zealand.
Ha kawei pat ka liang u Farukh Choudhary, u Noufal PN bad u Hmingthanmawi Ralte ki la shah pyllait noh na ka kynhun kaba ïakhun ïa ka SAFF Championship bad kin wanphai biang sha ka klob jong ki, ka Mumbai City FC. Shuh shuh, u Ronney Kharbudon un nym leit sha Dhaka namar ka jingmynsaw.
Ka kynhun India kaban leit sha New Zealand ka la ïakynduh lang ha Bengaluru ha ka sngi Saitjaiñ, 07 tarik u Naiwieng bad kan ïoh ïa ka jingkilanmet ha kane ka Sngi U Blei shuwa ban leit sha Auckland ha ka por miet.
U Khalid Jamil u la ong, “Ka New Zealand ka dei ruh ka ri kaba ïalehkai ha ka World Cup bad kadei ka kynhun kaba khlaiñ bha, bad kine ki ar tylli ki jingïakhun kin long ka jingtynjuh kaba bha ïa ngi shabar na la ïing. Ngi kwah ban pynkhreh bha, ban ïalehkai da kaba janai bad ban pyndonkam ïa kane ka kabu ban kiew shaphrang kum ka kynhun.”