Lap ka HNYF shibun ki kam pynroi ba pyntrei da ka tnad JMB khlem pyndep kumba la mang pisa

Jowai, Naiwieng 06: Ka Hynñiewtrep National Youth Front (HNYF) West Jaiñtia Zone kala ujor daka RTI pyrshah ïa ki skhim pynroi hapoh ki thaiñ Jowai haka 25/06/2026 haka tnad Municipal Board, Jowai bad ka seng kala pan ïa ka jingleit jurip lang hadien ba la ïoh ïa ka RTI haka 06/08/2026.
Ha ka 11/9/2026 kila pynlong ïaka jingleit jurip (Join Inspection) hapdeng ki dkhot ka HNYF, ki ophisar bad ki nongtrei ka Jowai, Municipal Board, kaba la sdang naduh ka por 12 baje mynsngi.
Ha ka jingleit jurip ïa ki jaka bapher bapher hapoh ka Jowai bad la lap ba ka ka Jowai Municipal Board kala dei ban leh ïa ka Painting kaba long Rs.1,24,81,380/- tyngka haka por jong ka Meghalaya Game ha shi lynter jong ka surok Jowai-Shillong haduh ka point “Well Come To Jaiñtia” ha Mookyndur bad na Ummulong sha Wahaiajar haduh Madan Lait Shnong Wahiajar bad kumjuh ruh na Lad Kiang Nangbah College sha Mihmyntdu bad Mihmyntdu sha madan Tre Tangliang Ialong. Hynrei kaba pynlyngngoh haka por ba leit jurip ym shym la don kano kano ka dak jong ka jingdro rong kumba la sakhi.
Ka Jowai Municipal Board kala pyntreikam ruh ïaki lynti ïaid kjat bapher bapher ryngkat hapoh ka Jowai bad kawei ka um dih. Haka jingleit jurip lang la lap ba kitei ki lynti ïaid kjat bad ka um dih kim shym la pyntreikam katkum ka jingkheiñ. Ki lynti ïaid kjat kiba long kumne, ka jingshna ïaka Footpath ha Iongpiah, Jowai kaba la antad ba kan long Rs. 10,00016/- tyngka ha ka jingjrong kaba 423 Meter hynrei ïa ka kam la pyndep tang 197.7 Meter. Kumta, ka jingjrong 225 meter ka long khlem da pyndep ïa ka kam.
Ka jingshna ïa ka lynti ïaid kjat ha Salaroh, Jowai kaba la antad Rs.6,49,685/- tyngka ha ka jingjrong kaba 247.5 meter bad ka jingtrei kaba la pyndep ka long tang 195.3 Meters. Kumta, ka jingjrong 52.2 meter ka long khlem da pyndep ïa ka kam.
Ka jingshna ïa ka lynti ïaid kjat ha Chahtngit, Jowai kaba la antad ba kan long Rs. 32,00008/- tyngka ha ka jingjrong kaba 1265 meter (1.265 KM) bad ka kam ba la pyndep ka long tang ha ka jingjrong kaba 210 meter. Kumta, ka jingjrong kaba sah 1055 Mitar (1.055 KM) ka long khlem da pyndep ïa ka kam.
Ka jingshna ïa ka tyllong umbam (Drinking Well) ha Chahtngit, Jowai kaba la antad ba kan long Rs. 8,00093/- tyngka haka jingjylliew kaba 6 meter, hynrei ka long pat tang 2 meter ka jingjylliew ym shym la pyndep ïa ka kam katkum ka jingkheiñ, ka um dih kam shym la don hadien ba la dep shna ïa ka bad ki nongshong shnong jong ka Chahtngit kim lah ban pyndonkam shuh ïa ka um ban dih namar ka jingtei bakla.
Ka jingshna ïaka lynti ïaid kjat ha Khliehïongriang, Jowai kaba la antad ba kan long Rs. 9,99,473/- haka jingjrong kaba 409 meter ym shym la pyntrei bad bad ka jingtrei footpath kam don satia ha Khliehiongriang, Jowai. Katkum ka kaiphod jong ka jingleit jurip haka 11/9/2026.
Kane ka jingleit jurip kaba la sdang haka por 12 baje shiteng sngi ka la kut noh ha ka por 3 baje shiteng janmiet ha kaba ki ophisar jong ka Jowai Municipal Board kila sangeh noh ban leit jurip khlem da pyndep shuh.
Na ka liang ka seng ka la kyrpad ïa ka Jowai, Municipal Board lyngba u PIO Shri. Hunbaitmiki Passah ban bteng pyndep ïa baroh ki jingleitjurip (complete Join inspection) ha katei ka 11/09/2026. Kiba kynthup lang ïa ki jaka ha Sabahmuswang, Iawmusiang hajan shiv mandir bad Khimusniang.
Kumta ha ka 22/10/2026 ka seng ka la thoh ïa ka jingujor sha u heh ophisar (CEO) halor ka kaiphod jong ka jingjurip lang, hynrei haduh kine ki sngi ym pat don kano kano ka jubab na u CEO. Halor kane ka HNYF kan sa pynlong ka jingbud dien ïa kane ka kam shaduh ka ïingbishar. Pynkut ka kyrwoh na u President ka (HNYF) West Jaiñtia Zone u S. Talang.