Nongpoh, Naiwieng 06: U Myntri Rangbah ka jylla u Conrad K Sangma mynta ka sngi u la leit ban pynlut por ha kylleng ki shnong ka Mawhati Constituency ban plie ïa ki surok PMGSY bapher bapher ban kyntiew ïaka roi ka par haka thaiñ Mawhati.
Kine ki surok ki kynthup ïa u surok PMGSY ba jrong tam haka jylla ba pynïasoh naka shnong Mawlasnai sha Kdohhati ha ka jingjrong kumba 20.50 km, u surok na Mawlaho sha Pamlatar ba jrong kumba 8 km, u surok na Umlaper sha Lymphuid ba jrong kumba 16.125 km.
Ha kane ka sngi la sakhi ruh da ka jingdonlang u Bah Charles Marngar MLA ka Mawhati, u Dr Abhishek Saini Deputy Commissioner ka Ri-Bhoi, u Giri Prasad SP ka Ri Bhoi, ki sahep naki tnad sorkar bapher bapher, ki nongïalam Shnong ka thaiñ Mawhati, ki riew Rangbah lem bad ki khynnah skul.
Nalor ka jingplie ïa u surok ha kane ka sngi la ioh ruh ban plie ïa u Maw Mawlasnai ba don ruh ka dur Jisu haka Shnong Mawlasnai.
Haba kren ha kane ka sngi naka liang u Conrad Sangma u la ong ba ka jingleit jong u ban iuhkjat ïaki shnong bapher bapher ka thaiñ Mawhati ka long ban iohsngew da la ki jong ki skhor bad ban iohi da la ki jong ki khmat ïaka jinglong jingman jong ki shnong ki thaw bad ki paidbah, khamtam ban pynpoi ïaki kam pynroi shaduh ki shnong ba kyndong tam jong ka jylla.
U la ong ruh ba kane ka dei ka sien ba nyngkong ba kum u Myntri Rangbah un ioh ban iuhkjat haka thaiñ Mawhati bad kane ka dei ruh ka history napdeng ki myntri rangbah ban poi sha ki shnong ba kyndong tam ha katei ka thaiñ.
Nalor kitei ki kam pynroi bala plie paidbah ha katei ka sngi naka liang u CM u la pynthikna ruh ba ha u bnai Nohprah ne Kyllalyngkot yn sdang ban siang rong ïa u surok ba dang sah naduh Sonidan sha Jagiroad naka bynta ka jingbit jingbiang jong ki paidbah khamtam u surok u ba dei u budlum ka roi ka par.
