Long ba la kloi ka sorkar ban leit ïalam ïa kiba pyrshah Ropeway sha Sikkim bad Shimla ban ïohi dalade: Paul

Shillong, Naiwieng 05: U Myntri ba khmih ïa ka tnat ki kam Jngohkai pyrthei u Bah Paul Lyngdoh u la ong ba ka Sorkar Jylla ka long kaba la kloi ba kan leit ïalam ïa ki kynhun ba pyrshah ïa ka Shillong Ropeway Project sha Sikkim bad Shimla ban khmih dalade kumno ki ropeway ki treikam hapdeng ki jaka lum.
Haba kren sha ki lad pathai khubor ha ka sngi Palei u la pyntip ba kane ka jingtyrwa ka long ïa baroh ki kynhun ba don bynta, kynthup ki dkhot ka Joint Action Committee Against Shillong Peak Ropeway Project.
U la ong, “Ngi long ba kloi ban ïakren shuh shuh bad kine ki kynhun da kaba ïalam ïa ki sha ki jaka kum ka Sikkim bad Shimla, kiba don ïa ki ropeway project hapdeng ki Hill Station.”
Ula ong ba ka por ban pyrshah ïa ka project ka la dep kut la slem bha bad kaba la ïaid mynta la 4 snem eiei.
U Myntri u la ong, “Ka don da ka por, phi tip, haba ki briew ki ïathoh shongkurim, u pastor lane u phadar u kylli hato phi don eiei ban ong mynta lane phi sngap beit jar jar ïa ka shyntur baroh shirta. Un nym ong satia, la phi don kano kano ka jingujor pyrshah ïa une u briew, ka briew, sa wan biang sha nga hadien saw snem. Ym don ki pastor/phadar ban ong ïa kata.”
Na ka liang jong u, u kynthoh ïa kane haba jubab ïa ka jingdawa ba ka Sorkar ka dei ban pynkynriah noh ïa ka ropeway project sha Sohra lane sha kiwei kiwei ki jaka kaba ki briew ki kwah ïa ka, hadien ka jingpyrshah kaba jur ha Shillong.
U la ong, “Peit, kane kam dei ka kam cut-and paste, kumba phi ju leh ha ki kor computer jong phi, lada pynkynriah kan long kumba hap ban sdang biang naduh bas dang.”
U la bynrap, “Ka rukom long jong ka khyndew ha katei ka jaka kan ïapher bad ka jinglong ka khyndew sha kiwei pat ki jaka. Ka jingbit na ka Defence Ministry ka lah ban nym donkam sha kiwei pat ki jaka. Shibun kiei kiei kin kylla lut lada pynkynriah ne rah noh ha kiwei ki thaiñ.”
U la ong ba ka ropeway kaba don hapdeng jong ka nongbah Shillong kan kyntiew ïa ka jingshemphang jong ki nongwan jngohkai pyrthei bad kan pynkiew ruh ïa ka dor bad ka kyrdan jong ka Shillong kum kawei na ki jaka jngohkai pyrthei kiba don ha kiwei pat ki jaka jong ka ri.
U Bah Paul u la bynrap da kaba ong, “Kine hi ki briew kiba ju ud ïa ki nongwan jngohkai pyrthei ba bam maggie da ka khot kyrteng ki ‘Maggie tourists’, ki dei ruh ki juh kiba ud pyrshah ïa ki projek ropeway. Kumno kata ka lah ban long? Phim lah ban ud ïa kawei bad ud biang ïa kawei pat.”
Shuh shuh u la ong, “Phi kren shaphang ka jngohkai pyrthei kaba wanrah ïa ka kamai kajih kaba heh hynrei ha ka jingwan jong ki nongjngohkai kaba duna. Kumno phi pynkiew ïa ka jingmyntoi na ka jngohkai pyrthei? Lada phi don ïa ka ropeway, ki briew kin ïoh ban mad ïa ka jingshem jong ki. Kumta ka jngohkai pyrthei hi kan long kaba pynsngewthuh bad pynmad ïa ki nongwan jngohkai. Kam dei tang ba ki wan ban leit peit ïa ki kshaid, hynrei ki wan ruh ban peit ia kiwei pat ki jingitynnad.”
U Bah Paul u la kyntait ruh ïa ki nia ba pyrshah ïa ki five star hotel. U la ong, “Don ruh kiba kylli balei donkam ïa ki hotel five star haba ngi don ki kshaid kiba itynnad. Phim lah ban khmih lynti ba ki nongwan kai na shabar kin wanrah ïa la ki jong ki tent bad sah harud ki kshaid. Ki donkam ban ïoh ïa ka jingshakri bad ka jingshem kaba bun ha ka jngwan jngohkai.”
Haba ïadei bad ka jingbym lah ban pynbeit ïa ka kam Trading Licence jong ka KHADC, u Bah Paul u la ong ba ka kompani ka la dep ban aplai ha ka 18 tarik Jymmang 2026, bad mynta ka aplikeshon ka dang don hapdeng ka jingpynkhreh bad bishar jong ka KHADC.
U la ong, “Haba ïadei bad ki projek kiba dei trai ka Sorkar, la ju shim ba ka jingpan laisen na ka Sorkar ka long tang kum ka kam pyndep ïa ki rukom treikam.”
Shuh shuh u la ïathuh ba ïa ka tala ha ka jaka ba pyntrei ïa ka project lah dep ban pynpait ha ka sngi Balang namar ka nongkynti ka dei jong ka Sorkar Meghalaya hapoh ka Tnad Forest.
Haba kylli la ka projek ka donkam ne em ïa ka laisen khaïi, u la jubab, “Donkam, ki la dep ban aplai bad ngi khmih lynti ba kin ïoh ïa ka laisen ha kine ki khyndiat sngi ban wan. Haduh mynta, tang ki kam ban pynkhreh ïa ka project kiba la sdang, hynrei ngi sngew skhem ba ngin ïoh ïa ka laisen.”
Halor kawei pat ka jingkylli, u Bah Paul u la bynrap, “To ngin shim ïa kawei ka sienjam hadien kawei. Lada lah ban pynbeit ïa kane ka kam ha ka kyrdan jong ka Director, ieh kan long kumne shwa.”