Shillong, Naiwieng 5: Ka jingïada kam lah ban sangeh tang ha kaba iathuh ïa ki samla ïa kaei kaba ki dei ban kiar, ka dei ban ai ïa ki jingthmu, ka jingtbit bad ka bynta ha ki shnong ki thaw jong ki, la ong u Director ka DREAM Mission u Bah Francis G Kharshiing ha ka sngi Palei.
U bah Kharshïing u la kren ïa kane hadien ba ka Drug Reduction, Elimination & Action Mission (DREAM) ka la pynlong ïa ka Outreach-cum-Deliberation Programme na ka bynta ki samla ba la pyndep ïa ka Industrial Training Institute (ITI), Shillong, kaba pynleit jingmut ha ki lynti iaid naduh ka jingpule ka ban lam sha ka ioh kam ioh jam bad ka jingïashim bynta ha ka imlang sahlang.
“Ka jingïada kam dei tang ban ïathuh ïa ki samla ïa kaei kaba ki dei ban kiar, ka dei ruh ban thaw ïa ki lad ki lynti, ban tei ïa ki sap bad ban ai ïa ki samla ïa ka lynti kaba dei bad ka bynta kaba don jingmut ha ki shnong ki thaw jong ki,” ong u Kharshiing.
Ka prokram ka long shi bynta jong ka rukom treikam kaba khamïar jong ka DREAM “Ka jingïada ryngkat bad ka jingtreikam” hapoh ka DREAM-YOUNG, kaba ïaid shabar jong ki jingpynsngewthuh paidbah ba ju leh ban weng ïa ki jingma kiba don hapoh kiba pynlong ïa ki samla ban shah ktah ha ka jingdih buaid.
“Da kaba ïarap ïa ki samla ban pynkylla ïa ka jingpule technical jong ki sha ka kam, ka jingseng kam seng jam, ka jinghikai ba kham bniah bad ki lad ban noh synñiang sha ka imlang sahlang, ngi wad ban pynkhlain ïa ka jingsngewthuh jong ki ïa ka jingthmu, ka jinglong laitluid bad ka jingïadei bad ka imlang sahlang.”
Ïa kane ka jingiathir jingmut la pynlong ha ka 5 tarik Naiwieng ha DREAM Conference Hall, Lower Lachaumiere, Shillong, ha kaba ki samla kiba la pyndep ïa ki jingpule na ki kam bapher bapher jong ka ITI Shillong.Kumba 100 ngut ki nongiashim bynta ki la ïashim bynta ha kane ka jingïa mir jingmut.
Ka jingïalang ka la bishar bniah ïa ki jingeh kiba ki samla kiba la pyndep ïa ka jingpule ki ïakynduh na ka jingpule ha ka liang ka jingstad sha ka kam bad ka la wad ïa ki lad ki lynti kiba lah ban treikam ban kyrshan ïa ki nalor ka training ba pura.
Ka jingiakren kaba kongsan ka long halor ka jingthaw ïa ki lad ki lynti na ka bynta ki samla pule ba kin pyndonkam bad pynkhlain ïa ki jingtbit jong ki ha ka liang ka jingstad da kaba pyniasoh ïa ki bad ki lad jingpule ka ban lam sha ka jingioh ioh jam bad ki lad jinghikai hapoh ki shnong ki thaw jong ki, bad kumjuh ruh bad ka DREAM-YOUNG Skills Centre ba la tyrwa.
“Kum kine ki lad ki lah ban pynlah ïa ki samla ba la shah hikai ym tang ban wad ïa la ka jong ka jingim hynrei ban long ruh ki nongpynsuk bad ki nongïalam na ka bynta kiwei pat ki samla kiba wad ïa ki sap bad ki kam,” ong u Kharshiing.
Ki jingiakren ki la pynpaw ruh ïa ka jingdonkam ban don ki jingiadei kiba kham khlain hapdeng ki jaka pule ba tbit, ki jingthmu jong ka sorkar, ki shnong ki thaw bad ki nongtrei, khnang ba ka jingpule ban ioh kam ioh jam kan pynkylla sha ki lad ki lynti kiba lah ban don jingkyrmen.
Ïa kane ka prokram la pyniaid da u Bah Kharshiing bad ka ITI Shillong ka kong Bonnie Sawkmie.
