Buh mawnongrim u Conrad Sangma bantei ïa ka Integrated Hospital 100 jingthiah ha Ummulong

Jowai, Naiwieng 05: U Myntri Rangbah ka sorkar jylla u Conrad. K Sangma mynta ka sngi 5 tarik u Naiwieng, 2026 ula wan ban buh ïa u mawnongrim ban shna ïa ka Ummulong Integrated Hospital kaba don 100 jingthiah haka shnong Ummulong, West Jaiñtia Hills District haka jinglut kaba ?53 Klur tyngka.
Ha kane ka sngi la synrang lang ïa u Myntri Rangbah ka jylla da u Symbud Myntri Rangbah u ma Sniawbhalang Dhar, u myntri ka koit ka khiah u ma Wailadmiki Shylla, nalor ki ophisar sorkar bad kiwei de.
Naka liang u myntri rangbah ula pynsngew ka jingdon jong kane ka jaka sumar kan ïarap shibun eh ïa ki nongshong shnong ka thaiñ Ummulong bad kumjuh ïaki shnong ba marjan ban ïoh jingsumar ba paka haka liang ka koit ka khiah shi bynta na ka jingpyrshang jong ka sorkar.
Ula pyntip ha kine ki 8 snem ba la dep kum ka sorkar kala trei ban pynbit pynbiang ïa ki jingduna haka jingtei ïa ki jaka sumar kaba la kiew bha mynta haba ïa nujor bad ki snem mynshwa. Nalor kata ka sorkar kala pynbuh shuh shuh ïa ki jaka pule Doctor hapoh ka Jylla, khnang ban pynmih shibun ngut ki Doctor la kummo kumno ha kine 7-8 snem ban wan yn lah ban pynmih haduh 350 ngut ki doctor haka shisnem, da kaba u kyntu ban ai jingsumar ïa ki nongpang dei ban long kiba sngewrit bad kiba bha mynsiem.
Ha kajuh ka por u Myntri Rangbah ula ai khublei ruh ïa u MLA ka Jowai u ma Wailadmiki Sylla uba la trei shitom ban wanrah ïa ki projek kiba donkam naka bynta ban ai jingshumar ïa ki paidbah jong ka thaiñ hi baroh kawei.
Ha kane ka Hospital kaba 100 jingthiah yn don ruh haduh 25 tylli ki jingthiah na ka bynta ban ai jingsumar ïa kito kiba kyrni ha ki jingdih ba sniew kum u Drugs.
Na ka liang ka shnong Ummulong kala pynpaw ka jingsngewnguh ïa u MLA ka thaiñ u ma Sniawbhalang Dhar bad u ma Wailadmiki Shylla kila la kloi ban pynïoh ïa kane ka Hospital, khnang ban ïarap ïa kiwei de ki shnong ba marjan bad ka Ummulong bad ïa ka jaka ban tei ïaka la ai sngewbha da ka shnong.