Jowai, Naiwieng 5: U Myntri Rangbah ka sorkar jylla u Conrad K. Sangma haka jingïadonlang u Deputy Chief Minister, ma Sniawbhalang Dhar kumjuh ruh u MLA ka Jowai u Wailadmiki Shylla uba long ruh u myntri ka tnat ka koit ka khiah, ryngkat u CEM ka Jaiñtia Hills Autonomous District Council (JHADC), u ma Thombor Shiwat, ki MDC ka JHADC, ki sahep na ka PWD Department, mynta ka sngi 5 tarik u bnai Naiweng, kila wan ban jurip ïa ka ‘Iawmusiang Shopping Complex’ bad ïa kane ka projek pyntrei thymmai la tip kum ka (Re-Development of Iawmusiang Market Jowai).
Kum ban shuh pynkynmaw ba kane ka Building jong ka Iawmusiang Jowai ka la sah teng da ki bun tylli ki snem na ki daw bym lah kiar, hynrei hadien ar snem mynta la sdang biang ka jingpyntrei ïa kane ka building jong ka Iawmusiang Jowai kaba long ka ïew kaba kongsan bad kaba la rim kaba don ha kane ka nongbah Jowai, kaba la pyndonkam na bynta ka ïadie ïathied jong ki briew ka Ri lum Jaiñtia.
Ha kaba na ka liang jong kitei ki heh sorkar ki la pynpaw ba ym slem shuh kata sa tang katto katne bnai la ïoh ban plie bad pyndonkam noh ïa kane ka building ba thymmai jong ka Iawmusiang na ka bynta ka jingbit jingbiang jong ki nongdie bad khamtam ïa ki paidbah nongthied nongpet.
La ïathuh ki dukan kiba don hapoh kane ka Iawmusiang Shopping Complex ki don haduh 369 tylli nalor ki Go-down, ka parking bad kiwei de. Ïa kane ka ïew la plie ïa u mawnongrim ban shna thymmai da u symbud myntri rangbah ka jylla u ma Sniawbhalang Dhar haka 13 tarik u Nohprah, 2024 haka jinglut kaba 25 klur 60 lak.
