Nongstoiñ, Naiwieng 04 : Ha shuwa jong u snem 1976 ka thaiñ Langpih ka don tang lai tylli ki skul kata ka Mawdiangsnam , Langpih bad Umtap Lower Primary kiba la seng da u (L) Maieit Hopingstone Lyngdoh ha u snem 1965 ha ka por ba u long u Excecutive Member jong ka Khasi Hills Autonomous District Council bad uba bat ruh ïa ka tnad pule puthi. Wat la kitei ki Lower Primary skul ki la don hynrei ki nongshong shnong kim pat sngewthuh ïa ka jingkordor jong ka jingnang jingstad bad ki dang pynshong nongrim ïa ka lawei jong ki khun ki kti ha ka trei ka ktah bad ka rep ka riang.
Dei tad haduh u snem 1976 ba u (L) bah Jessesingh Snar u la shah thung kum u Myntri jong ka Raidmynsaw Rambrai Syiemship u la khot ïa ki hynñewngut ki rangbah u bah Bonington Wahlang , bah Jospar Wanñiang , bah Phrikshon Kharlyngdoh, bah Edring Marngar , bah Srikshon Shangdiar, bah Byllonsingh Marweiñ, bah Bransly Ñianglang bad kiwei kiwei ki rangbah ha kaba ki la thaw syndon ïa ka Managing Committee kaba don ïa u Chairman , Secretary bad khyndai ngut ki dkhot. Dei naduh nangne ba i phylliah ding barit jong ka jingshai i la sdang ban tyngshaiñ suki jai haduh ba ka sorkar lyngba ka ophis jong u D.I.of school West Khasi hills district ka la mynjur bad ithuh ïa ki nongkitkam bad ki dkhot jong ka Managing Committee bad shanniah ha ka Commmittee ba kan peit bad khmih kumno ban pynïaid shaphrang ïa katei ka skul.
Haba phai ha ka jingsdang jong katei ka skul ym lah ban len ba ki laingut ki nonghikai kiba la prat lynti ban pynshai ïa katei ka thaiñ lyngba katei ka skul kata u (L) babu Bransly Wahlang uba la pyndep ïa ka matrik (class X) ua la ong u Headmaster ba nyngkong , u (L) babu Miningstar Nonglang kum u Asstant Headmaster uab ala pyndep ïa ka PUC class XII ba ngi khot mynta bad ka kong Ïorlis Syiemlieh kaba dang shu pass class VII .
Wat la katei ka skul ka la sdang ban ïeng bad iphylliah ding jong ka jingshai i la sdang ban kham phynai hynrei ki erïong erngit ki la lynshop na ka por sha ka pork at haduh ba itei ijingshai i jingshai ila lip noh shipor kata ha u snem 1979 ha ka por ba ki pulit jong ka Assam ki la leit ban kerkut ïa ka ktem pulit jong ka Meghalaya bad ki la knieh lut ïa ki tiar ki tar bad kem ïa baroh ki pulit jong ka Meghalaya bad rah ïa ki sha Guwahati bad leit bret pat sha Byrnihat. Dei ha utei u snem ba katei ka skul ka la sangeh noh namar baroh ki nongshong shnong naduh Umpha, Mawdiangsnam, langpih, Iewnogma, Umtap, Mawlan, Umwali bad kiwei kiwei ki shnong ki la ïa phetwir lut bad leit shong shnong ha Kyndongei, Nonglang, Langja bad kiwe kiwei ki jaka. Hadien katto katne snem lyngba ka jingai mynsiem bad pynshlur jong u (L) Maieit Hopingstone Lyngdoh ba kin leit phai bad ba u la kular ruh ban ïakren bad ka sorkar Assam ba kam dei ban pynwit ïa ki nongshong shnong ba ki shnong ki thaw ki la don biang ha katei ka thaiñ.
Dei tad haduh u snem 1982 ka sorkar ka la phah ïa u D.I.of School Nongstoiñ ba un leit jngoh ïa katei ka skul ha kaba lyngba jong u ka skul ka la ïoh jingïarap da ka grant na ka bynta ban siew tulop ïa ki nonghikai. Kumta naduh utei u snem ka skul ka la nang roi suki jai haduh ba ka la kylla long ka sharak kaba pynthaba jingshai ïa katei ka thaiñ bad lyngba jong katei ka upper pimary school ka sorkar lyngba ka jingtrei shitom jong ki nongkitkam jong ka Managing Committee , ki nonghikai bad ka jingkyrshan ba radbah jong ki long ïng na ki shnong kiba don ha ka thaiñ ryngkat ka jingïatreilang bad u bah K.P.Pangñiang MLA barim na ka upper Primary School la lah ban kyntiew kyrdan shuh shuh sha ka Secondary school ha kaba na ka liang ka Hynñiewtrep Youth Council kawei na ki sengbhalang jong ka jylla kaba la trei borbah na ka bynta ban kyntiew ïa ka jaitbynriew lyngba ka pule puthi ka la ïadon bynta lang ha kaba nohsynñiang ban siew tulop ïa ki nonghikai ka la pynlong ïa katei ka skul ba kan nang roi bad kiew sted ha ki liang baroh.
Kaba kham sngewtynnad shuh shuh ka long ba ka jingnang roi jong katei ka skul ka wan rah ruh ïa ka jingïalong shi tylli ka jingïaieit bad ka jingsngew shipara hapdeng ki Khasi kiba dei ki trai jaka bad ki Nepali kiba wan shong wan sah ha katei ka thaiñ. Ha kajuh ka por lyngba katei ka skul ka don ka jingkyrmen kaba khraw ba ha kawei ka sngi ka shnong Langpih kan kylla long ka sshnong kaba shai tam ha katei ka thaiñ.
