Jowai, Naiwieng 04: Ka All India Congress Committee (AICC) Observer ka Kumari Tilotama Loitongbam kaba dei peit ïaki lai tylli ki District hapoh ka jylla kata ïaka West Jaiñtia, East Jaiñtia bad Ribhoi District, mynta ka sngi 4 tarik u Naiwieng kala wan hiar sha Jowai ban pynlong ïa ka jingialang bad ki nongkitkam ka party ha ophis treikam ka West Jaiñtia Hills DCC kaba don ha Newhill Jowai.
Kane ka jingwan hiar ka KM. Tilotama Loitongbam sha Jowai kaba long ruh ka Observer ka ‘Vote Bachao-Desh Bachao’ Campaign kala pynsngewthuh halor ki nongrim jong ka Party Congress ban dawa pynhiar shuki bad ban pynshitom ïa u Chief Election Commissioner, u Gyanesh Kumar.
Shuh shuh kala pynsngew ïa ki kam thombor kiba ka sorkar NDA hapoh ka jingïalam jong ka BJP kala ba shim ïa ka sienjam kaba lah ban ktah ïa ka lawei jong ki nongshong shnong ka Ri da kaba lum jingkheiñ thymmai lyngba ka Special Intensive Revision (SIR) bad pynduh pyndam ïa ki kyrteng jong ki nongthep vote ki bym kyrshan ïa ka BJP.
Kala ong katkum ka SIR lada kheiñ ïa ka jingjah ki kyrteng kaba long tang 2% kan shem la ktah ei ei, hynrei ka jingjah pat ki kyrteng kaba la poi shaduh ka 20% bad ïa kane ym lah satia ban pdiang da ki nonghsong shnong ka Ri.
Halor ka jingsdang ban ïakhun ïa ka hok ki nongthep vote na ka liang ki nongïalam ba hakhmat ka Party Congress naduh u Rahul Gandhi kila sdang ban ïakhih ïa kane naduh u snem 2005 kaba la bteng haduh mynta, da kaba ong u CEC, u Gyanesh Kumar ba mynta u dei uba la shah pynïaid ha u Narendra Modi bad u Amit Shah ban pynjah ïa ki kyrteng briew katba ki mon.
Kumba long mynta hapoh ka jingïalam ka BJP kala ai ka jingïada ïa u Chief Election Commissioner, u Gyanesh Kumar ba un leh katba mon bad kane ka paw ba ka long kaba ma bha ha ka jingshakri paidbah, shuh shuh kala ai nuksa wat haka prokram ïakhih kaba la khot pynlong haka Ramlila Maidan ha Delhi da ka Congress ba dawa pynhiar shuki ïa u Gyanesh Kumar, hynrei ka sorkar BJP kala khang wat ïa ki lynti rel, ki liengsuiñ bad ki Bus ban ïaid, watla kata ruh ki paidbah kila poi palat da ki 10 lak ngut.
Kala pynsngew ba ki paidbah kila sdang mynta ban wan shakhmat ban ai jingkyrshan ïaka Party katba dang mih ki sngi ha kylleng ki jaka jong ka Ri India.
Ha kane ka sngi la donlang da u ma E.G War, General Secretary WJHDCC u ma Emlang Laloo, Nartiang BCC President, ma Pynkhreh Lakiang, Assistant WJHDCC, bah Eugene Laloo Block President Laitumkhrah BCC bad kiwei de ki nongkitkam ka District.
