Shillong, Naiwieng 04: Ka Mawpat SC ka la khur 3 point hadien ba ka la wanphai na ka shi kol ban pynliem ïa ka Nongkrem da 2-1 ha ka jingïalehkai kaba ar jong ka Group A ha ka SSA Champions Cup hynne ka sngi Balang ha SSA Stadium.
Ryngkat ka jingkyrshan kaba shitrhem na ki nongkyrshan, u Thompson Lyngdoh (46’) bad u Sparkle Khongshei (68’) ki la pynkhihjar na ka bynta ka Mawpat ha ka kylla miet hadien ba ka Nongkrem ka la lamkhmat ïa ka kylla step lyngba ka kol jong u Sawadame Tang (21’).
Watla ka Nongkrem, kaba wan ba ar (runners-up) ha ka First Division, ka ïalehkai ha ka kyrdan kaba kham heh ban ïa ka Mawpat kaba dei ka lahduh ha ka Second Division, hynrei ka jingsngewthuh ka long ba kane kan jin da long kaba suk na ka bynta ka Mawpat, kaba la pynkhlaiñ ïa ka kynhun hashwa ka samoi ïalehkai 2026 bad la nang pynkhlaiñ shuh shuh da ka jingwan ïasoh ki san ngut ki nongïalehkai ba ka la shim wai na ka bynta ka Champions Cup. Kane ka rukom shim wai ka long tang ïa ki kynhun ïalehkai Second, Third bad Fourth Division, ha kaba ki kynhun kiba ïakhun ha ka Shillong Premier League bad First Division ki hap ban ïalehkai tang da la ki jong ki rangïalehkai kiba la register.
Hynrei wat hapdeng kane, dei ka Nongkrem kaba la pynkhihjar nyngkong. Ka jingïaibteng ban ñion bad pashat bol shakhmat hapoh phyllaw kol jong ka Mawpat ka la plielad ïa u Sawadame ban ïoh thep ïa ka kol bad pynlong ïa ka Nongkrem ban lamkhmat ïa ka kylla step.
Hynrei ka Mawpat ka la jubab mardor tang mar ïa wanphai sha ka kylla miet, kaba la urlong da ka jingpyrshang kaba jam jong u Thompson tang hadien 30 sekhon ba la sdang biang ïa ka jingïalehkai. Nangta u Sparkle u la pyndep ïa ka jingwanphai jong ka Mawpat da kaba thep ïa ka nam tam ha ka minit kaba 68.
Ka Champions Cup kan wanphai biang ha ka 07 tarik Naiwieng da ar tylli ki jingïalehkai jong ka Group B. Ha ka por 12:30 baje mynsngi ka Shillong Lajong FC ba wan ba-ar ha ka SPL kan aireng pyrshah ïa ka lahduh jong ka Third Division ka Sanmer SC ka ban bud sa ka jingïakhun hapdeng ka lahduh jong ka First Division ka Mawkhar SC pyrshah ïa ka Sohryngkham kaba wan ba-ar ha ka Second Division ha ka por 3:45 baje nohphai sngi.
