Jowai, Naiwieng 02: Ka ophis jong ka Sub-Divisional Officer (Supply), Amlarem haka jingïatreilang bad ka Meghalaya State Food Commission ha kane ka 30 tarik Risaw, 2026 kila pynlong ïa ka jingpynsngewthuh paidbah ne ka Regional Awareness Camp halor ka aiñ jong ka National Food Security Act (NFSA), 2013, hapoh ka phang ‘A Sustainable Initiative for Achieving Zero Hunger’ ha Syiem Jingsuk Hall, Lailyngdoh, Amlarem Civil Sub-Division.
Ha kane ka prokram la wanrah lang ïa ki State Food Commission, ki District bad ki Sub-Divisional, ka tnad Supply, ka tnad Pule puthi, ka ICDS, ki nongdie Fair Price Shop, ki nongtrei Anganwadi, ki nonghikai, ki khynnah skul bad ki nongmihkhmat na ka shnong, da ka jingthmu ban pynkhlaiñ ïa ka jingpynsngewthuh shaphang ka ka jingdonkam ban ïoh ïa ka jingbam kaba biang bad ka tei ïa ki nongshong shnong.
Na ka liang jong u ma Lahkmen Rymbui, u Myntri ka sorkar Jylla ba peit ïa ka Education, Information & Public Relations, Law, Revenue and Disaster Management, u la long u Kongsan. La ïadonlang ruh u bah D.P. Wahlang, Chairman, Meghalaya State Food Commission, u Bah T. Lyngwa, IAS (Retd.), Chairperson, State Social Audit Council, u I.W. Ingty, IAS (Retd.), Member Secretary, Meghalaya State Food Commission bad Dr. M. Tyngkan, Member, Meghalaya State Food Commission, nalor kiwei de ki ophisar jong ka tnad Supply, ki bor pynïaid District bad kiwei de na ki tnad sorkar bapher bapher.
La ïoh ïa ka jingkren pdiang sngewbha da ka kong L.B.R. Marak, MCS, Assistant Commissioner, West Jaiïtia Hills, bud sa ka jingrwai pdiang (welcome song) da ki khynnah skul jong ka Syiem Jingsuk Higher Secondary School.
Kala don ruh ka jingpyni drama da ka tnad ICDS, ka jingleh tynrai bad ka jingtreikam ka PM POHSHAN.La ïoh ïa ka jingkren na ki dkhot jong ka Meghalaya State Food Commission bad kumjuh na u Kongsan.
