Jowai, Naiwieng 02 : Ka Balang Katholik ha kylleng ka pyrthei shisien shisnem ka ju kynmaw burom ïa ki Mynsiem kiba la khladnoh bad mynta ka sngi 02/11/2026, ki paidriewngeit jong ka Balang Katholik Parish Jowai ki la rakhe kynmaw burom ïala kiba ha ïing hasem, ki lok ki jor, ïa kiba ieid bathoiñ bad ïa baroh ki Mynsiem kiba la khladnoh na kane ka sla pyrthei.
Ha shwa ban kyrkhu ïa ki Mot jingtep la pynlong ïa ka jingkñia Mass bakhuid kaba la lamkhmat da u Most. Rev. Ferdinand Dkhar d.d. Bishop ka Jylla Niam Jowai ha ryngkat ka jingsynranlang ki Lyngdohsohblei ka Parish Jowai.
U Bishop Ferdinad Dkhar haba kren ha kane ka sngi u ong ba ha ka Balang Katholik ki don lai kynhun ki paidriewngeit, ki riewngeit kiba dangïaid pilgrim ha kane ka sla pyrthei, ki riewngeit kiba dang don ha Dingpynkhuid kaba dang pynkhuid ïalade na ki lait ki let ki tam ki duna jong ki bad ka kynhun ki riewhok ne ki riewkhuid kiba la don ha ïing U Blei lane ha Bneng.
U Bishop Ferdinand u pynkut ïa ka jingkren jong u da kaba ong ba ka jingkñia Mass bakhuid ka long ka jingkñia saitpap na ka bynta kito ki Mynsiem kiba dangdonkam ïa ka jingduwai jong ngi kiba dangim ha kane ka slapyrthei ba U Blei Un map ïa ki lait ki let ïa kito ki Mynsiem kiba dangdon ha ka Dingpynkhuid, ka jingkyrpad ïa kito ki Mynsiem kiba la don ha ïing U Blei ba kin nangpynkhraw ïa ka burom U Blei bad ba kin nangïasaid lem hakhmat U Blei na ka bynta ki paidriewngeit kiba dangïaid pilgrim ha kane ka sla pyrthei ba kin nangim ka jingim ka babha, kaba miat bad ka jingtieng burom ïa U Blei.
Hadien ka jingkñia Mass bakhuid U Bishop hi dalade bad ki Lyngdohsohblei (Phadar) ki la kyrkhu ïa baroh ki jingtep bad ki Mot jingtep kiba don ha u Lumkyntang jong ka Balang. Kane ka jingburom ïa ki Mynsiem kiba la khladnoh ka paw na ka jingpynkhuid ki paidriewngeit ïa u Lumjyntep, ka jingairong, ñiat Shun (niat Shuni) ïa ki Mot jyngtep bad ka jingbuh syntiew kiba ha ïing ha sem ïala kiba ieid kiba thoiñ jong ki.
Ïa kane ka jingkynmaw burom la leh ha u Lum jingtep ka Balang Katholik Parish Jowai, ha Mihmyntdu bad ha kiwei kiwei de ki Parish, Na ka liang ka Balang CNI, Jowai ruh kala kynmaw burom ïa kane ka sngi ha u lum jingtep jong ka uba don ha Khliehïongriang, Jowai.
