Shillong, Risaw 28: Ki dkhot jong ka Joint Action Committee ba pyrshah ïa ka Shillong Ropeway Project, mynta ka sngi Balang kila iakynduh ïa u Syiem ka Hima Mylliem bad dawa ban pynduh pyndam noh ïa ka sanad bala ai sha ki Rangbah Shnong ba aiwai ïa ka jaka na ka bynta ka project.
Haba kren sha ki lad pathai khubor hadien ba la dep ban kynduh ïa u Syiem Ainam Manik Syiem ka President ka JAC ka kong Deborah Marbaniang kala ong, “Kine ki Rangbah Shnong kila shet kylla a ki nongshongïshnong ka Riat Laban Dorbar Pyllun.Ngi la dawa ïa u Syiem ban pynduh pyndam noh ïa ka sanad jong ki”
Kala pynksan ba ki Rangbah Shnong kim don satia ia ka bor ban aiwai ïa ka jaka jong ka Shillong Viewpoint.
“Ka Viewpoint kam dei ka jaka shimet.Ka dei ka jaka paidbah, ka jaka ka shnong ba long trai da ki nongshong shnong ka Riat Laban Dorbar Pyllun.Ka sanad na ka Hima Mylliem ka thung ïa kine ki Rangbah Shnong kum ki nongkhmih nongsumar-nongiada ïa ka jaka.Kam ai satia ïa kano kano ka hok sha ki ba kin die, lilam lane aiwai” ong ka kong Deborah.
Kat kum ka jingong jong ka, ki nongialam ka Riat Laban Dorbar Pyllun kila kular ba kin sa pynduh noh ïa ka jingaiwai.
“Ngi la ïakynduh ïa u President bad Secretary hashuwa kane.Kila kular shai ha ngi ba kin sa pynduh noh ïa ka soskular aiwai bala iasoi bad ka Sorkar.Kin sa ïashong jingialang mynta ka sngi bad kin sa ai sha ngi da ka jingthoh.Ngi dang ap ban ioh ia ka jingpynthikna da ka jingthoh” kala ong.
Haba iai ban ia ka nongrim jong ka JAC, kala ong “Ngi la kyntu jur ia ki Rangbah Shnong ban pynduh noh ia ka soskular bad ban pyndam ia ka project. Ka Sorkar ruh ka dei ban pynduh pyndam noh ia ka.Lada ym pynduh pyndam ia kane ka project, ka JAC kan ym shu shu kli kti”.
