Seisoh ka jingdawa ka HYC sdang moramot u kontraktor ïa ka surok Nongshilong – Jakrem

Mairang, Risaw 28 : Ka jingleit ïakynduh ïa u Sub Divissinal Officer ka tnad PWD ha ka ophis trei kam ha Nongkasen ha u bnai ba la dep ha kaba ïadei bad ka jingtrei torti jong u kontraktor ka surok Nongshilong – Jakrem ka long kaba seisoh ha kaba u Sub Divissional Officer ka tnad PWD u la shimkhia ïa ka kam bad u la btah ïa u kontarktor ba u dei ban moramot noh ïa ki bynta ba la jot ha katei ka surok .
Ha kine ki khyndiat sngi ba la dep ha ka jingbuddien jong u nongthohkhubor jong u Mawphor la lap ba u kontraktor u la sdang ban moramot ïa baroh ki bynta kiba la sdang ban pra . Kum ban pynkynmaw ba ha u bnai ba ha ka 9 tarik jong u bnai Nailur ki nonïalam ka Hynñiewtrep Youth Council Parïong area unit ha ryngkat ka jingïadon lang jong u Nongthohkhubor jong u Mawphor ki la leit ban jurip ïa katei ka surok ha kab ki la lap ba ka jingtrei torti ka la long shba palat bad hakatei ka juh ka sngi ki la hiar sha ophis jong u Sub Divissional Officer ka tnad PWD kaba don ha Nongkasen ha kaba ki la aiti ruh da ka jingthoh bad kyrpad ba un leh ïa kaba don kam.
Ha kaba ïadei bad katei ka surok na ka liang ki nongïalam ka seng ki la kyntu ruh ïa u Sub Divissional Officer ka tnad PWD ba un btah ïa u kontraktor uba siangrong ïa ka bynta kaba dang sah kaba sdang na khmat jong ka Parïong PHC haduh ba kut ba u dei ban pyndep noh ïa ka jingsiangrong hapoh u bnai Nohprah jong une u snem namar ba haduh mynta u kontraktor uba ïoh jingtrei ban siang rong naduh katei ka jaka haduh ba kut um pat sdang satia ban siangrong hynrei ki mawria ba u la dep siang ki la sdang ban pra bad saphret. Kumta ka por ka la dei ba ïa katei ka bynta kaba dangsah la dei ban pyndep noh kloi katba lah khnag ba kan ym don ka jingthut ïa ka kit ka bah bad ka leit ka wan jong ki paitbah.