Nongstoiñ, Risaw 28 : Ka West Khasi hills district ka la kynjoh sanphew snem thik naduh ba la ïoh ïa ka ha u snem 1976 bad na ka bynta ka jingdap sanphew snem jong ka ki bor pynïaid district ki la pynlong ïa ka jingrakhe kaba la sdang naduh ka taïew ba khatduh jong u bnai Nailur.
Naduh ba la sdang ïa ka jingrakhe ïa ka jingdap sanphew snem ki bor pynïaid district ki la pynlong ïa ki prtokram bapher bap her kiba la phiah ha ki san tylli ki Block kata ka Nongstoiñ, Mawshynrut, Rambrai bad Rimuliang C& RD Block ba kin pynlong ïa ki prokram kiba bun jait. Hadien ba ki san tylli ki Block ki la dep ban pynlong ïa ki prokram ha kane ka sngi balang ka 28 tarik la pynlong ïa ka jingrakhe ha madan New Nongstoiñ kaba la sdang naduh ka por 10. baje mynstep.
Shuwa ban sdang ïa ki prokram ba bun jait la ïoh ïa ka jingrwai ïa ka theme song jong ka west Khasi hills district bad ka theme song jong ka jylla da ka kynhun rwai kaba la tip kum “Kawei ka sur” kaba dei na Nongstoiñ . Hadien katei ka jingrwai la ïoh ïa ka jingkren na ka Smt Hema Nayak IAS Deputy Commissioner ka West Khasi hills u bah Phyllasingh Syiem u Syiem ka hima Nongstoiñ bad kiwei kiwei ki rangbah.
Hadien ka jingkren jong ki la thang ïa ki mombati da u bah Gabriel Wahlang MLA ka Nongstoiñ uba long u kongsan u bah R.G. Momin MLA ka Rambrai Jyrngam uba long u symbud kongsan u MDC ka Nongstoiñ bad Mawshyrnut bad ka Deputy Commssioner . Ha kajuh ka por u kongsan u la pyllait ïa ka Suvenir lane ka kot ba la thoh ban pynsah jingkynmaw ïa ka jinglong jingman jong ka district naduh ba sdang haduh ba kan da kynjoh sanphew snem.
Katei ka jingrakhe ïa ka jingdsap sanphew snem ka long ruh ka sngi ka ban sah jingkynmaw junom ha kaba ki bor pynïaid district jong ka West Khasi hills ki la pdiang ïa ka jingai jingmut jong ki nongïalam jong ka Hill Sate People Democratic Party ba kin pynkup burom ïa ki volunteer kiba la shah set pahtok ha ka por jong ka jingïakhih ban dawa la ka jong ka jylla. Kumta na ka liang ki bor pynïaid district ha katei ka sngi kum ka dak jong ka jingburom ïa kitei ki volunteer ba la shah set phatok ka la pynkup burom ïa ki hynrei napdeng jong ki ba la ïadon bynta kiba wan poi ki don tang laiphewhynriew ngut .
Haba phai pat ha ka jingrakhe ïa katei ka jubilli ksiar jong ka district ka la don ka jingbym hun bad ka jingbynñiaw na kiba bun ki paitbah namar na ka liang ki bor pynïaid district jong ka West Khasi hills kam shym la kynmaw satia ban khot sngewbha ïa baroh ki ophisar sorkar kiba la ai ka jingshakri ïa ka West Khasi hills hynrei iiba la shah pynkynriah kam noh sha kiwei pat ki jaka ba kynthup ïa kiba dang don ha ka kam bad kiba la shongthait kumjuh . Nangta ki bor pynïaid district ki la klet ruh ban khot sngewbha ïa baroh ki Nongmihkhmat kiba la jop ha ki snem ba mynshuwa kum ki MLA bad MDC kiba dei napoh ka district, Nangta ïa kiwei kiwei ki riew rangbah kiba pawkhmat kum ki nongthohkot bad kiwei kiwei. Kumta ka don kam ïa ki borpynïaid district ba lada ka sngewdei ban rakhe ïa kano kano ka lynkhuh snem jong ka district kum ka jingdap hynriewphew ne hynñewphewsan snem ki dei ban peitbniah bha khnang ba kan ym wanrah ïa kano kano ka jingbuhkhoh na ki paitbah.
