Pynhap pyrda u Bah Ronnie Lyngdoh ïa ka prokram ai jinghikai jong ki MLA ha Mahabalipuram

Shillong, Risaw 28 : U Bah Ronnie V. Lyngdoh, MLA bad Deputy Chief Whip jong ka Meghalaya Legislative Assembly, u la long u Kongsan ha ka jingïalang pynkut jong ka prokram ai jinghikai ïa ki nongmihkhmat paidbah (Legislators’ Leadership Programme), kaba la long ha ka 27 bad 28 tarik Risaw 2026 ha Mahabalipuram, Chennai.
Ïa kane ka prokram la pynlong da ka Office jong u Lamphang ka Tamil Nadu Legislative Assembly, ha ryngkat ka jingïatreilang bad ka Meghalaya Legislative Research Forum (MLRF). Ka prokram ka la wallam lang ïa ki MLA na Tamil Nadu bad kiwei ki jylla ban ïoh jinghikai halor ka Riti Synshar jong ka Ri, ki jingkitkhlieh jong ki MLA, ka koit ka khiah, ka jingïada ïa ka mariang, ka jingsynshar lyngba ka teknoloji bad ki polisi pynroi.
Ha kane ka jingïalang, u Bah Ronnie Lyngdoh u la pyni ruh ïa ka model jong ki jingkieng siej ba im jong Meghalaya, kaba pynpaw ïa ka pateng tynrai, ka jingtip tynrai ha ka jingïada ïa ka mariang bad ka jingïadei hapdeng ki briew bad ka mariang.
Haba ai jingkren ha ka jingïalang pynkut, u Bah Ronnie u la ong ba ka kam nongïalam kam dei tang ka jingbat ïa ka kyrdan, hynrei ka dei ban wanrah ïa ka jingkylla kaba bha ha ka jingim jong ki paidbah.
“Ka kyrdan ka lah ban ai bor ïa ngi, hynrei tang ka jingkitkhlieh kaba ai jingmut ïa kata ka bor,” u la ong, da kaba kyntu ïa ki MLA ban sngap ïa ki paidbah, ban pynbeit ïa ki jingeh jong ki bad ban pynbha ïa ki jingshakri ha ki kam pule puthi, ka koit ka khiah bad ka kamai kajih.
U la ban jur ruh ba ka jingïalam dei ban bishar lyngba ki kam ba la leh bad ki jingmih, ym tang lyngba ki jingkular.
U la kyntu ruh ban pynkhlaiñ ïa ka jingïatreilang hapdeng Meghalaya bad Tamil Nadu, bad u la pynpaw ka jingkyrmen ba ka Meghalaya Legislative Assembly, ryngkat bad ka MLRF, kan pyrkhat ban pynlong ïa kum kane ka prokram ha Meghalaya.
Ha kaba kut, u la ong, “To ngin pynkylla ïa ka jinghikai sha ka kam, ïa ka kam sha ki jingseisoh, bad ïa ka jingkitkhlieh paidbah sha ka jingkylla kaba neh.”
Ki nongai jinghikai bad ki riewshemphang ki kynthup ïa u Mohan Dhamotharan, u Consultant ha ka jingpynroi ïa ka jingïalam bad ka jingïatreilang shabar ri na Germany; u Samuel Gnanadurai, u riewshemphang ha ka polisi, ka pule puthi bad ka jingïalam kynhun na Chennai; ka Prof. Anu P. Manoharan, Assistant Chair bad Associate Professor ha ka Public Service and Health, Suffolk University, USA; ka Dr. Vidya Ramanan, Assistant Professor ha ka Political Science, Madras Christian College; u Justice K. Chandru, u nongbishar barim jong ka Madras High Court; u Ram Kumar Sathupuram, Director, National Health Mission, Sorkar Meghalaya; u Dr. Sampath Kumar, IAS, Additional Chief Secretary bad Vice-Chairperson jong ka MLRF, Sorkar Meghalaya; u Stephen Anurag Prathipati, Project Officer bad Co-Lead jong ka MLRF, NISG; u Prof. L. Venkatachala na Madras Institute of Development Studies, uba dei u riewshemphang ha ka environmental economics bad ki marpoh khyndew bad ki jingdon jingem mariang; ka Tmt Balambigai V., Tech Lead, CM Dashboard, Tamil Nadu e-Governance Agency; bad u Dr. Suresh Babu, Director jong ka Madras Institute of Development Studies, uba dei u riewshemphang ha ka trade liberalisation bad development economics.