Haduh 13 klur ngut ki nongthep vote kiba la shah pynduh, ka dei ka jingleh thok ba khraw tam

Shillong, Risaw 28: Haba kynnoh ba ka dei ka jingleh thok elekshon kaba khraw tam ha ka histori jong ka ri, u nongialam ba rangbah jong ka seng Congress u Adhir Ranjan Chowdhury ha ka sngi Balang u la dawa ba u Chief Election Commissioner un risain noh na ka kam bad ban pynshitom ïa u namar ba u la pynduh ïa ki klur ngut ki nongthep vote.
“U CEC u dei ban risaiñ khlem jingteh kyndon.U dei ban shah pynshitom namar ba u la leh ïa ka kam runar kaba khraw tam ha ka thup kyrteng nongthep vote ha kaba da ki klur ngut ki nongshong shnong ki la shah pynduh ïa ka hok thep vote jong ki,” la ong u Chowdhury.
Haba kren sha ki lad pathai khubor ha Shillong, une u nongïalam ka liang pyrshah ha Lok Sabha u la ong ba baroh kawei ka rukom pynïaid elekshon ka donkam ïa ka jingpynkylla bad dei ban thombor ïa ka rukom jied ïa u CEC.
“Mynshwa u Chief Justice jong ka ri India u la don bynta ha ka selection committee kaba lai ngut ki dkhot.Ka sorkar ka la pynrung ïa la u jong u myntri ban pynthikna ia ka jingbun paid.Nga la pyrshah ïa kane ha khmat u Modi.Ka kynhun jied nongbishar ka long katkum ka jingbun paid ha ka sain pyrthei tang ban pynthikna ba ki briew jong ki hi kin ialam ïa ka election commission,” u la ong.
“Ka ri baroh kawei ka la shah rong noh ha ki jingbakla elekshon ba la shna da ka bor synshar ha ki jingïadei bad ka tnad elekshon commission.Kane ka dei ka jingleh thok elekshon kaba khraw tam kaba la ju sakhi,” u la kynnoh.
Haba wad bniah ïa ka jingroi jong ki nongjied, u Chowdhury u la ong, “Ha ka 25 tarik u kyllalyngkot, u snem 1950, ka Election Commission ka la sdang ïa ka jingleit lynti jong ka.Nangta ki nongthep vote ki don 17 klur, mynta ki don 97 klur. Ha ki jingthep vote ba la dep ha Lok Sabha, 64 klur 66% haba ia nujor bad ka 44-45 %.”Baroh ki lah ban sngewthuh ïa ka jingheh.Lada 13 klur tam ki nongthep vote ki shah weng na ki thup kyrteng bad kim lah ban thep vote, hato phi lah ban mutdur ïa ka jingsngewsih bad jingduh jingkyrmen? Ka jingdon jong ki nongthep vote ba la weng ka lah ban palat ïa ka jingbun briew jong kiba bun ki ri Europe.”
“Ka election commission bad ka sorkar ki la ïalehkai ïarieh ban pynduhjait ïa ka jinglong ba shisha jong ka jingshah pynduh hok.Ka dei ka jingthmu kaba la thmu bha,” u la ong.
U Chowdhury u la ong ba ka INDIA bloc ka la khot ïa ka jingialang ha Delhi bad kyntu ïa ki briew na ka thain shatei lammihngi ba kin ïa poi lang.
“Watla ki don ki jingeh ha ka liang ka jingpynbiang, ki briew ki dei ban wan.Kane ka dei ka jingkhot jong ka ri ban ïada ïa ka Riti Synshar.Khlem ki elekshon kiba laitluid bad kiba hok, ym lah ban pynim ïa ka synshar paidbah.Katba kane ka juk kan synshar ïa ka Election Commission, ngim lah ban khmih lynti ïa ki jingthep vote kiba laitluid bad kaba hok,” u la ong.
U la kynnoh ba arngut ki Election Commissioners ki la pyrshah ïa ka jingpyntrei kam ïa ka SIR.
“Ka Commission ka don lai ngut ki dkhot.Arngut ki Election Commissioners naduh ba sdang ka SIR ki la pynpaw ïa ki mat ba ka lah ban ktah ïa ka rukom jied nongmih khmat.Hynrei da kaba pynduh noh ïa ka jingmut jong ki, u CEC ba la kyrshan da ka liang synshar u la leh ïa kajuh ka kam runar man la ka sngi, namar kata da ki klur ngut ki nongshong shnong ba shisha ki la shah pynduh.” la ong.
“Ka sorkar ka ïada ïa ki bym lah ban ïada – ka CEC kaba ym lah ban ïada da kano kano ka jingkynthoh,” u la bynrap.
U Chowdhury u la ong ba u nongialam ka Congress u Rahul Gandhi u la ju rah ïa kane ka mat.
“U Rahul Gandhi u la ïakhih tang ban pynthikna ïa ka hok jong ki nongthep vote katkum ka riti synshar jong ngi.Khlem ka thup nongthep vote kaba laitluid bad kaba hok, phim lah ban dawa ïa ka elekshon kaba laitluid bad kaba hok.Lada ki nongthep vote ki shah lute, ka jingïaid lynti baroh kawei ka kylla long tang ka jinglehkai,” u la ong.
“Kam dei ka kam jong ki seng ha ka liang synshar ban ïada ïa ka Election Commission.Ka dei ka tnad treikam kaba synshar hi katkum ka kyndon 324.Ka dei ban ïada ïalade.Hynrei ki nongialam seng ha ka liang synshar ki long kiba thrang ban ïada ïa ka.Kane ka dei ka buit ban ialam bakla ia ki briew.Ka EC ka la shah pynsniew ha ki jingthmu ba sniew jong ka lyngba ki jingthmu ba sniew jong ka.” la ong.