Shillong, Risaw 28: Ka Nongkseh SS&CC ka la mad ïa ka namrem da tang 1-0 kol ha ka jingïakhun kaba itynnad ha ka Group C jong ka lympung I-League 3 pyrshah ïa ka Lakecity FC, ba la long hynne ka sngi Balang ha SSA Stadium, ha kaba u Abhijit Tawhare u la thep ïa ka namtam ha ka minit kaba 58.
Ha ka jingïakhun ka Nongkseh ka la shah pynduna sha ka 10 ngut ha ka minit ba 20 jong ka kylla step hadien ba u Ieitlang Syiemlieh u la shah pynshitom da ka red card naba pynur ïa u Marvin ka Lakecity.
Ka jingeh kam shym la kut hangne na ka bynta ka Nongkseh, ha kaba ka kynhun ka la shah pynduna biang sa u wei u rangïalehkai ha ka minit kaba 76, kata hadien ba u Banraplang Pyngrope u la shah beh na madan namar ka jinglehbakla kaba jur pyrshah ïa u Arif Shaikh.
Watla ka ïalehkai duna ki player ha kiba bun ki bynta jong ka jingïakhun, hynrei ka Nongkseh ka la ïai bteng ban thaw ïa ki lad ban thep kol, hynrei u nongapkol ka Lakecity u Hitendra Singh u la lah ban pyntreikam ïa ka sap jong u ban khanglad ïa ki katto katne ki jingpyrshang kiba thikna ban pynneh pynsah ïa ka kol lamkhmat jong ka kynhun.
Ka kol jong ka Lakecity ka la urlong hadien ba u Abhijit Tawhare u la pyrshang ha ka rukom kaba janai tang mar ïa ïohpdiang ïa ka bol na u Saurabh Nikam ha ka minit kaba 58, bad u la pyndep ïa ka kamram da kaba pyllait lyngba u nongap kol ka Nongkseh u Wanteilang Malngiang.
Nalor ba ka ïalehkai duna ki player, ka jingskhem ki rangap dien jong ka Lakecity bad ka jingtbit u nongap kol u Hitendra ka la buh jingeh ïa ka Nongkseh ba kan thaw ïa ki kabu kiba thikna ban pyrshang sha kol.
Lah ban kdew ba kine ki ar tylli ki red card ki la ktah bad buh jingeh ïa ka jingpyrshang jong ka Nongkseh ban shem ïa ka kol pynïakhaid, bad ka kol lamkhmat kaba tang 1-0 ka la ïaineh haduh kaba kut jong ka por.
Ki jingïakhun kin wanphai biang lashai ka sngi Thohdieng, 30 tarik Risaw, ha kaba ka Kuppuraj FC kan aireng pyrshah ïa ka Chhaygaon FC ha ka por 9 baje mynstep, bud sa ka jingïakhun hapdeng ka Nongkseh SS&CC pyrshah ïa ka Godavari FC kaba lamkhmat ïa ka Group, ha ka por 5 baje janmiet. Baroh ar tylli ki jingïalehkai kin long ha SSA Stadium, Polo.
