Mairang, Risaw 26 : Ka jingdon jong u bah Wenri Marweiñ u rangbah uba don ka jing shemphang na ka bynta ban trei ïa ki kam ba bun jait bad uba don ïa ka thong ban kyntiew ïa ka ïoh ka kot da kaba ïeng ha la ki jong ki kjat bad ban pynim ja ïa ki nongshong shnong ka la long ka jingmyntoi kaba khraw ïa ki paitbah. Ha kine ki arphew snem tam da ki spah ngut ki nongshong shnong na Kynshi bad kiwei kiwei ki shnong ki la ïoh jingmyntoi bad ki la im ja da lyngba ki kam ba u bah Marweiñ u la bynshet ha ki ba kin trei.
Ki nongshong shnong kiba la im ban trei rynkat bad utei u rangbah ki long naduh ki kynthei , ki samla bad haduh ki rangbah ruh. Na ka liang ki rangbah bad ki samla shynrang ki dei kiba trei ha ki karkhana shna kali, ki karkhana tylliat maw, ki nongñiah ïa ki kali ba kynthup ïa ki trok bad ki Mahindra Pickup kiba leit kit ïa ki um bilor sha kylleng ki jaka hapoh ka jylla . Nalor kata ki nongtrei ha ka karkhana pynmih um , ka karkhana shna sabon bad bun kiwei kiwei pat ki kam.
Ha kaba ïadei bad ki artylli ki karkhana ki kam ki la ïaid shait shait bad kaba dang sah mynta ka dei satang ka karkhana shna prek. U bah Marweiñ haba ïakren bad u nongthohkhubor jong u Mawphor u la ong ba mynta u dang pynkhreh shait shait ïa ki jingdon kam bad u dang ïaleh ban wad ïa ki Engineer kiba la tbit bha ha ka ban pynbit pynbiang ïa ki kor ki bor kiba dei ban wanrah ha katei ka karkhana . Ha kajuh ka por u la ong ba kum u rangbah haba u trei ïa kano kano ka kam um kwah ban shu trei tang ban ïoh jingmyntoi hynrei u kwah ba kiei kiei ki tiar ki tar kiba u pynmih na ki karkhan jong u ki dei ban long kiba janai bad kiba biang bha ha kaba pyndon kam .
Haba kylli pat haduh katno bnai kan dang shim por ba un sdang ban tei ïa ka karkhan shna prek u bah Marweiñ la ong ba um pat lah ban pynthikna namar u hap ban ap haduh ba un da ïoh ïa ki nongtrei kiba thikna bad kiba la tbit bha ha ka kam . Shuh shuh u la ong ba ïa ka jaka ban shna ïa ka karkhana u la dep ban pynbit pynbiang bad lehse ha u snem ban wan un sa lah ban sdang shna ïa katei ka karkhana. Ha kajuh ka por u la ong ba ynda u la dep ban shna ïa katei ka karkhana kin dang don shibun ki nongshong shnong kiba u hap ban ai kam bad kan long ruh ka jingmyntoi kaba khraw na ka bynta jong ki.
