Hapoh u Naiwieng ai por ka Dorbar Shnong Mawïonglumsyntiew ïa ki trai jaka ba ki dei ban pynkhuid

Nongstoiñ, Risaw 26 : Na ka bynta ban lait na ka jingpluh ding ha ka por tlang ka dorbar shnong Mawïonglumsyntiew West Khasi Hills district ha u kyrwoh ba la pyllait ha kane ka lah sngi u blei ka 26 tarik Risaw ka la kyntu ïa ki trai jong ka jaka kaba don ha pdeng jong ka shnong Mawïonglumsyntiew ba ki dei ban da pynkhuid ïa ki sañium bad ki phlang ïap khnang ban lait na ka jingpluh ding ha ki aïom tlang. U bah D.Parïong Headman jongka shnong haba ïakren bad u nongthohkhubor jong u Mawphor u la ong ba ha katei ka jaka ki don ki bynta kiba dei jong ki riew shimet bad ki don ruh phra tylli ki jaka mission lum jingtep bad baroh sawdong katei ka lum ka long kaba sañium bha . Ha kajuh ka por u la ong ba hadien ba ka dorbar shnong ka la peit bniah ïa katei ka jaka ka la lap ba lada ki trai jaka kim pynkhuid kan wanrah ka jingma kaba khraw ïa ki ïng ki sem jong ki nongshnong shnong namar lada jia ba ka pluh ding ha kano kano ka por khamtam lada jur bha ka lyer ka lah ban wanrah ïa ka jingjia ba sngewsih ïa ki ïng ki sem.
Ha kaba ïadei bad katei ka jaka u bah Parïong u la ong ba ki la dep ai ka jingpyntip sha ki bor pynïaid district ba kin ai ka jingpynbna paitbah . Nalor kata u la ong ba ka dorbar shnong ka la ïakut ruh ba kan ai por ïa ki trai jaka bad ki ba peit ba khmih ïa ki phra tylli ki mission lum jingtep ba hapoh jong u bnai Naiwieng ki dei ban pynkhuid bad lada kim kohnguh ïa ka jingbthah jong ka dorbar shnong lad jia ka jingpluh ding ha kano kano ka por ki dei ban shim ïa ka jingkitkhlieh bad ka dorbar shnong kam banse ban leit sha ki bor ba halor.