Shillong, Risaw 26 : U MP barim ka Jylla ha Rajya Sabha, u Dr. WR Kharlukhi um shym la ai ïa ka jubab kaba shai la un mih neem ban aireng ha ka elekshon MLA kaban long ha u snem 2028.
Haba kylli la u don ne em ka jingthmu ban ïakhun ïa ka elekshon MLA ban wan, u la jubab ba un sa peit ynda ka snem 2028 ka la poi.
U la ong ba mynta um pat kwah ban pynbna eiei halor kane ka kam, bad un sa shim ïa ka rai haba ka por ka la biang.
Kane ka jingkren jong u ka dei ha ka sngi ba u mih ban pynbna paidbah ban ai ka jingkyrshan kaba pura ïa u kyrtong MP ka Congress, u Bah Vincent H Pala uban aireng ha kane ka elekshon MP shiteng samoi.
Lah ruh ban pynkynmaw hangne ba u Dr. Kharlukhi u la bat teng kum u President ka NPP Meghalaya ha shwa ba u Bah Prestone Tynsong un shimti ïa kane ka kam.
