Halor ka khuid ka suba pynlong jingïathir ka Seng Longkmie ha ka jingdap 50 snem ka WKHs

Nongstoiñ, Risaw 26: Shi bynta jong ka jingrakhe ïa ka Jubili Ksiar jong ka West Khasi Hills District, na ka liang ka Seng Longkmie jong ka shnong New Nongstoiñ, ha ka sngi nyngkong ka la pynlong ïa ka prokram ban pynsngewthuh paidbah ïa ka jingkhuid jingsuba. Kane ka jingïalang ka la long hapoh ka Hall jong ka Market Complex, New Nongstoiñ.
Ha kane ka jingïalang kaba kyrpang ka Hema Nayak IAS Deputy Commissioner jong ka West Khasi Hills District, ka la long kum ka kongsan ha ryngkat ka jingïadonlang u bah S.Rashir Headman ka shnong New Nongstoiñ MDC ka Mawshynrut Konstitwensi, u bah M. Thongni, ka kong A. Kharsyntiew secretary jong ka Seng longkmie ki riew rangbah ka shnong bad kiwei kiwei.
U Bah S. Rashir haba ai jingkren ha katei ka jingïalang u la ong ba ka jingdap sanphew snem jong ka District, ka dei ka jingtrei shitom bad jinglenlade jong ki riew rangbah kiba naduh ki por kiba mynshwa, khamtam ki nongmihkhmat kiba kynthup ïa u Bah Raisen Mawsor ba la bam kwai ha dwar u Blei bad u bah Mawlot kiba trei bor bah tad haduh ban da ïoh ïa ka District bad ka shong sa ha kane ka pateng aiu kan leh na ka bynta ki longdien.
Katba na ka liang ka DC ka la ban jur halor ka jingdonkam ban leh khuid, leh suba bad ban pynneh pynsah ïa ka sor kaba khuid bad kaba itynnad. Ka la ong ba watla la pynlong bun ki prokram kiba itynnad kum shibynta ban rakhe ïa ka Jubili Ksiar jong ka District, hynrei ki jingthmu kiba kyntiew ïa ka jingkhuid jingsuba ki long kiba kongsan khamtam eh na ka bynta ka imlang sahlang.
Ka Deputy Commissioner ka la ïaroh ruh ïa ka jingtrei shitom jong ka Seng Longkmie ryngkat ka jingkyrshan jong ka Dorbar Shnong, kaba la shim ïa kane ka sienjam ban noh synñiang sha ka jingrakhe ïa ka Golden Jubilee lyngba ka prokram ka ban ai jingmyntoi ïa ka imlang sahlang da kaba shi hi ïa ka jingkitkhlieh ha ka lut ka sep.
Ka la pynpaw ruh ïa ka jingdonkam ban buh ïa ki jaka bret jaboh bad ka la ïawer bad kyntu ïa baroh naduh ki shnong ki skul ki hospital, khamtam ki paidbah ban ai ka jingïatreilang na ka bynta ban wanrah ïa ka khuid ka suba. Ka la pynpaw ruh ba kiba bun ki briew na shabar ka Jylla ki tang shu ïoh sngew ba dei na Meghalaya, kin ong ba ka dei ka Jylla kaba khuid tam hapoh ka Ri khamtam ka East Khasi Hills ka ju ïoh ïa kata ka nam.
Ha kane ka prokram la wan ban ïashimbynta ruh da ki nongmihkhmat jong ka New Nongstoiñ Sports, Social and Cultural Club bad ka Seng ki trai bad nongñiah taksi jong ka thaiñ Nongstoiñ. La pynphuh pynphieng shuh shuh ïa kane ka jingïalang da ki jingrwai bad ki drama lyngkot kiba pynpaw ïa ka jingkordor jong ka jingkhuid jingsuba, ba la pyni da ki dkhot ka VDP New Nongstoiñ bad na ka Thwei Baïar CLF.