Shillong, Naitung, 31: Ka jingkyrngah jong ka Sorkar Meghalaya Democratic Alliance (MDA) ban shimti pura da kaba pynïaid hi noh ïa ka Emergency Medical Services khlem da aiti shuh sha ki Kompeni ka la pynlong ïa ki nongtrei jong ka GVK EMRI-108 ban dang bteng ïa ka jingsangeh treikam kaba la kynjoh mynta sha ka sngi kaba khatlai.
Ki nongtrei jong ka GVK EMRI-108 kiba don hapoh ka shatri jong ka Meghalaya EMRI Workers Union (MEMRIWU) ki la sdang ïa ka jingsangeh treikam kaba khlem pud sngi naduh ka 18 tarik mynta u bnai bad kaba dang ïai bteng haduh mynta.
Dang ha ka taiew ba ladep ki nongïalam jong ka MEMRIWU kiba la ïakynduh ïa u Myntri ka Koit ka Khiah ka Sorkar Jylla u James PK Sangma um shym la lah satia ban ai ïa kano kano ka jingkular bad kyrngah beit markhmat ba ka Sorkar Jylla kan ym lah da leilei ruh em ban shimti ïa ka Emergency Medical Services.
U Nongai Ktien jong ka MEMRIWU u Bah Roypar Kharraswai ha ka jingïakren bad u Mawphor u la ïathuh ruh ba u Myntri ka Koit ka Khiah u la kren da kaba shai ba um lah satia ban shim marwei ïa ka rai katkum ka jingdawa jong ka Seng kaba la pynbor ïa ka Sorkar ban shimti hi na ka bynta ban pynïaid ïa ka Emergency Medical Services. “Hynrei ngi la kyntu ïa u Myntri ka tnat ka Koit ka Khiah ba un rah ïa kane ka mat jingdawa hapoh ka jingïalang Kynhun Myntri khnang ba kan dup lah ban shim ïa kano kano ka rai,” ong u Bah Kharraswai.
“Lada ïa ka Emergency Medical Service ha kiwei ki Jylla la aiti ban pynïaid sha ki Kompeni, hynrei balei ka Meghalaya kam pyni nuksa ba kan long ka Jylla kaba nyngkong eh ban pynïaid hi ïa ka Emergency Medical Service,” u la ong.
U la ong ruh ba ha Meghalaya ka jingdon jong ki nongtrei ka EMRI-108 ki dang duna bha lada ïa nujor bad kiwei pat ki Jylla bad lada ka long ha kane ka rukom ka dang pynsuk shikatdei eh ïa ka Sorkar ban shimti pynïaid ïa kane ka kam namarba ka ym ban khia than ïa ka Sorkar namarba naduh kaba sdang dei ka Sorkar hi kaba bei pisa sha ka Kompeni GVK ban pynïaid ïa kane ka jingshakri ym dei satia ka Kompeni kaba bei pisa.
Haba kynthoh ïa ka jingkam jong u Myntri ka Koit ka Khiah ba ka Sorkar kam lah ban shimti ïa kane ka kam, une u Nongai Ktien jong ka MEMRIWU u la ong, “ar snem mynshwa ha ka por ba la wan lynshop ka jingpang khlam COVID-19 ki ophis jong ki Deputy Commissioner ki lah ban pyntyllun sani ïa ka jingshakri sha ki paidbah ha baroh kawei ka jylla hynrei balei u Myntri ka Koit ka Khiah pat u kam ba ka Sorkar Jylla kam lah?”
“Ngi khmihlynti bad ngi kyrpad ruh ba ka Sorkar kan pyrkhat sani bha halor kane ka jingtyrwa jong ngi bad ngi khmihlynti ruh ba ka Sorkar kan khot ïakren biang sa shi sien khnang ba ka jingthmu kaba bha kan dup urlong,” la ong u Bah Kharraswai.
“Lada ngim ïoh ïa ka jingdawa, ngin sa nang pynjur shuh shuh ïa ka jingïakhih bad ngin sa khot lang ïa ki para nongtrei na rilum Garo ban wan lut sha nongbah Shillong ha kine ki khyndiat sngi,” u la ong.
