Shillong, Risaw 25: Ka Nongkseh Sports & Cultural Club ka la pynliem ïa ka Chhaygaon FC da 4-0 kol ha ka jingïakhun ba-ar jong ka ha ka Group C jong ka I-League 3 2026–27 ha SSA Stadium, Polo, ha ka janmiet sngi Saitjaiñ.
U Chesterpaul Lyngdoh (35’) u la thep nyngkong ïaka Nongkseh shuwa ba u kapten u Hardy Cliff Nongbri un pynjlan ar shah ïa ka kol lamkhmat ha ka minit kaba 57 bad u la thep ruh na ka penalty ha ka 89 minit. U Owanijuh Pajuh (90+3’) ula pyndep ïa ka jingjop da kaba pynkhihjar ha ka minit pynjlan shuwa ban kut.
Ka Nongkseh ka la ïoh ban pyrshang nyngkong eh sha kol ha ka minit kaba 12 ha ka por ba u Lyngdoh u la pyrshang ban thep na ka liang kadiang, hynrei u nongapkol ka Chhaygaon u Kaji Md Nadish u la ïoh kem ïa ka bol da kaba suk.
Khatduh eh ka jingïakhaid ka la shah pynïakhlad noh ha ka minit kaba 35 hadien ka jingbakla sngewthuh jingmut hapdeng u Nadish bad u rangïalehkai ba shadien u Aryan Nakra. Hadien ba ïohpdiang ïa ka bol pashat na u nongap kol, u Nakra u la pyrshang ban pynphai biang ïa ka bol. U Lyngdoh u la mareh pynstet ban knieh ïa ka bol bad ïaid lait ïa u nongap kol shuwa ban thep, kaba la pynlong ïa ka Nongkseh ban lamkhmat da 1-0 ha ka kylla step.
Ka kol ba ar ka la wan ha ka minit ba 57. Kane ka la urlong da ka jingïatrei lang hapdeng u Ieitlang Syiemlieh, uba la pashat ïa ka bol sha u Nongbri, ha kaba une u kapten ka Nongkseh u la pynïasoh tiak da ka khlieh ban pynjlan 2-0 ïa ka kol lamkhmat.
Ka Nongkseh ka la ïai bteng ban thaw ïa ki kabu ksiar, ha kaba u Lyngdoh, u Syiemlieh bad u Pajuh ki la ïadon bynta lang ha ki katto katne ki jingpyrshang. Ka la ïoh ïa ka penalty ha ka minit ba 89 hadien ba u Aibiang Mame Nongneng u la shah pynur hapoh box ha u Sri Annajit Rabha ka Chhaygaon, nangta u kapten ka Nongkseh u Hardy, u la shimti khlem jingbakla ban pynjlan ïa ka kol lamkhmat da 3-0.
Ka kol ba khatduh ka la wan ha ka minit ba lai jong ka por pynjlan da ka jingpyrshang kaba jam na u Owanijuh.
Ka Nongkseh kan ïakhun biang ha ka 28 tarik Risaw pyrshah ïa ka Lakecity FC ha ka por 5 baje janmiet ha SSA Stadium.
