Pynkhlaiñ ki bor distrik ban pyntikna ïa ka suk ka saiñ, thwet jur ïa kiba donkti kawang petrol bom : DC ka East Khasi Hills

Shillong, Risaw 24 : Hadien ba ka nongbah Shillong ka la sakhi ïa ki jingjia shah kawang petrol bom katto katne tylli ki jaka, na ka liang u Deputy Commissioner ka East Khasi Hills, u Abhilash Baranwal, ha ka Sngi Thohdieng u la ong ba ki bor District ki la peitngor halor ki ar tylli ki bynta, kata kawei ban ïoh ïa ka jingshaniah jong ki paidbah bad ha kawei ka liang pat ban thwet ïa ki runar kiba donkti ha ki kam runar.
Haba kren bad ki lad pathai khubor, u DC u la ong ba ki Sector Magistrate bad ki ophisar ka district ki dang don ka jingïadei ryngkat ryngkat bad ki Rangbah Shnong, ki sordar bad ki nongïalam shnong bapher bapher, ban pynshlur bad pynshngaiñ ïa ki nongshong shnong.
“Ha kaba ïadei bad ka aiñ bad ka shongsuk shongsaiñ halor kine ki jingjia shah kawang petrol bom dang shen na ki bor distrik ngi don ar tylli ki kam hakhmat. Kawei ka long ban shim ïa ki lad ki lynti ban tei ïa ka jingshaniah bad ki shnong bapher bapher, bad ki kynhun paidbah bapher bapher. Kane ka kam ka dang ïaid shakhmat lyngba ki ophisar jong ngi, ki Sector Magistrate kila ïakynduh bad ki Rangbah Shnong, ki sordar bad ki nongïalam shnong bapher bapher, ban wanrah ïa ka jingshaniah bad ban pyni ïa ka jingshimkhia jong ki bor distrik ban pynneh ïa ka suk ka sain,” la ong u Baranwal.
Haba kren halor ka jingtreikam ki pulit, u la ong, “Ha kaba ïadei bad ka kam ki pulit, ka ophis jong u Superintendent of Police ka dang leh katba lah ban wad bad ithuh ïa kiba donkti ha kine ki kam, khnang ba yn lah ban pynshitom ïa ki katkum ka aiñ.”
Haba jubab ïa ka jingkylli halor ka jingduna ki Village Defence Parties (VDP) ha nongbah Shillong, u la ong ba kane ka mat la dep ban pynbeit ha ki shnong bapher bapher.
“Ïa kane ruh la pynsngew da ki Sector Magistrate ha ki shnong bapher bapher,” u la ong.