Ka hukum beh seng jong ka UDP kam don jingmut shuh hadien ba la dep ïasoh : Bah Paul Lyngdoh

Shillong, Risaw 24 : U MLA barim ka United Democratic Party (UDP), u Bah Paul Lyngdoh, u la ong ba ka hukum beh seng kaba la pynmih da u President ka UDP, u Bah Metbah Lyngdoh, pyrshah ïa u bad ar ngut kiwei pat ki MLA kam don jingmut shuh da kaba ong ba ka long kumba shoh ïa u kulai uba la ïap.
Lah ba kdew hangne ba ka UDP ka la duh noh ïa 11 ngut na ki 12 ngut ki MLA jong ka, kiba la leit pynïasoh sha kiwei pat ki seng saiñ pyrthei. Na kine, 8 ngut ki la leit sha ka BJP, bad u Lamphang ka Ïingdorbar Thaw Aiñ u la dep ban ithuh ïa ka jingpynïasoh jong ki.
Katba lai ngut kiwei pat ki la leit sha ka National People’s Party (NPP) kaba bat ïa ka sorkar. Ka jingpan jingithuh ïa ka jingpynïasoh jong kine ki lai ngut, kaba la aiti ha ka 19 tarik u Risaw, ka dang ap ïa ka rai jong u Lamphang.
Kine ki lai ngut ki MLA kiba pynïasoh sha ka NPP ki long u Bah Paul Lyngdoh na West Shillong, u Bah Renikton Lyngdoh Tongkhar na Mawkyrwat bad u Bah Nujorki Sungoh na Mookaiaw. Dei hadien ba la mih ki khubor ba ki la pynïasoh sha ka NPP ba u President ka UDP u la pynbna ba la beh seng noh ïa ki.
Haba kren halor kane ka bynta, u Bah Paul Lyngdoh u la ong ba kam donkam shuh ban ai jingkren halor ka hukum beh seng.
U la ong ba ka UDP ka la pynmih ïa ka hukum beh seng hadien ba kine ki lai ngut ki MLA ki la dep ban aiti ïa ka jingpan jingithuh ïa ka jingpynïasoh jong ki sha u Lamphang.
“Ka long kumba shoh ïa u kulai uba la ïap. U kulai u la ïap lypa, hynrei phi dang bteng ban shoh ïa u,” u la ong haba la kylli la ka hukum beh seng kan ktah ne em ïa ka jingpynïasoh jong ki.