Wat lada u bnai Risaw u lajan kut artad hynrei dang bteng ka jylla ban ïohmad ka jingshit kaba jur

Shillong, Risaw 23: Watla kane ka dei ka por jong ka snem ba ki briew jong ki jaka lum jong ka Meghalaya ki sdang ban phong ïa ki jaiñ sweater bad ki jacket jong ki, hynrei ha une u bnai Risaw u dang pynshisha ba u dang long uba kham shit ban ïa kaba ju long, la kumno kumno ha ka por mynsngi, ha kaba ka jingshit ka poi sha ka jingshit kaba ym ju ïohi kumba ju long barabor.
La ong ba ka jingshit jingkhriat jong ka nongbah Shillong, ka la poi sha ka 25.5°C ha ka sngi Balang, kaba long 3.8 degree palat ban ïa kaba ju long, ong ka tnat peit mariang jong ka Ri India ka Indian Meteorology Department (IMD).
La shem ba ka jingkham shit shuh shuh ka dei ha ka shnong bad ka thaiñ Sohra, ha kaba ki nongthew jingshit ki la pynpaw ïa ka jingshit kaba 29.1°C, kaba long kumba 5.3 degree palat ïa kaba ju long naduh ka sngi Balang.
Ka la shem ruh ba ka jingshit ka la long kumjuh sha kawei pat ka liang jong ka Shillong Plateau kaba ha Umïam, ha kaba ka IMD station, ka la ïoh ïa ka jingshit kaba heh naduh ka sngi Balang, kaba long 29.4°C, kaba long 2.8 degree tam ïa kaba ju long.
Ha ka sngi Baar pat ka kaiphod jong ka IMC ka pyni ba ha Ampati kane ka shnong ka la ïoh ïa ka jingshit kaba heh haduh 33.9°C kaba long 1.6 degree tam na kaba ju long. Hajan jong ka Tura (33.7°C) bad Williamnagar (31.8°C) ruh ki don ha ki 30 degree.
Ym shym la don kano kano ka jinghap slap ha Meghalaya ha kine ki 24 kynta ba ladep bad ka IMD ka khmih lynti ba ka jingtyrkhong ka suiñbneng kan dang ïaibteng.