Pynlong ïalap elekshon shiteng samoi ka NPP Jaiñtia Hills ïa u Dr. D.R.L Nonglait ha Mihmyntdu

Jowai, Risaw 23: Ka National People’s Party (NPP) jong ka 2-Jowai Constituency ha kane ka sngi Palei 22 tarik ka la pynlong ïa ka jingïalang Paidbah ha madan Wahriong Mihmyntdu ban ïalap By-Election ïa u Dr. D.R.L Nonglait u kyrtong ka Party ban ïakhun ïa ka MP Lok Sabha naka 1-Shillong Parliament Constituency.
Ha kane ka sngi da ki hajar ngut ki paid nongkyrshan ka NPP kila wan tuid sha kane ka jingïalang jong u kyrtong ka NPP u Dr. D.R.L Nonglait uba la pynsngew ïa ki mat ki jura na ka bynta ka jingtreikam jong u bad ka party kata ban pynbha, ban tei bad ban pynshai.
Ki nongïalam ba hakhmat ka Party kiba la wan ban kyrshan ïa u Bah Nonglait ki kynthup naduh u Symbud Myntri Rangbah ma Sniawbhalang Dhar, u MLA ka Jowai ma Wailadmiki Shylla, ka MLA kong Santa Mary Shylla, u MLA ma Comingone Ymbon, u CEM ka JHADC ma Thombor Shiwat, ki MDC bad ki nongkitkam ka Party.
Hashwa kane la ïoh ki kyntien pdiang da u Waheh Shnong ma Abul Phawa, ka jingpdiang thymmai ïa kiba pynïasoh sha ka Party, la ïoh ruh ka jingpyni Video ïa ki kam pynroi bapher bapher jong ka sorkar hapoh ka Jaiñtia Hills bad ka jingpyllait ruh ïa ka jingrwai By-Election jong ka Party.
U Dr. Nonglait haba kren u pynpaw ka jingsngewnguh ïaki nongtrei kam ka party kiba la lah ban pynlong ïa kane ka jingïalang kaba shongshit da ka jingwantuid ki nongkyrshan. Ula pynsngew ruh ïa ki kam kiba ka sorkar kala leh naduh ka roi ka par ha baroh ki liang kaba la wanrah ka jingkylla dur ïa ka jylla.
Kum u kyrtong MP ula kular ban ïakren pynbeit bad ka sorkar kmie ban pyntreikam noh ïa jingdawa ban pynrung ïa ka ktien Khasi hapoh ka riti synshar ka ri, ban pynurlong ïa jingdawa ka sorkar jylla ïa ka ILP. Ula ai ka jingïaroh ïa ka sorkar kala shim ïa ka rai ban ithuh ïa ka ktien Khasi hapoh ka jylla bad pyrshah ïa ka jingtip ïa u Uranium napoh ka jylla.
Ha ka juh ka por ula pynsngew ïa ka jingitynnad jong ka Wah Myntdu kaba la mih na ka shnong Mihmyntdu bad ker talawiar ïa ka sor Jowai bad bsa umbam umdih ïa ki nongshong shnong.
Kum u kyrtong u pan ka jingkyrshan na ki paidbah ban don kawei ka jingmut bad pynjop ïa u kyrtong uba don haka liang synshar, khnang ba un ïoh pynurlong ïa ki mat jingdawa, namar marwei khlem ka jingkyrshan naduh u Myntri Rangbah ki myntri sorkar ka long kaba eh ban pynïaid ïa ki kam pynroi.
Katba u ma Wailadmiki Shylla haka jingkren ula ai khublei ïa baroh bad kitbok kitrwiang ïa u kyrtong ba un ïoh ka jingjop, ‘kum u myntri u kwah ïa ki paidhbah ba kin bishar ïa ki kam pynroi kiba la wanrah hapoh ka Rilum Jaiñtia bad kyntu ban nang pynkhlaiñ shuh shuh ïa ka Party da kaba jied ïa u kyrtong MP uba don haka liang synshar jong ka jylla.
“Ka NPP ka dei ka seng riewlum ba pura kaba la seng napoh ka jylla bad da ka jingstad u Myntri Rangbha la pynïoh National Party ïa ka”, ong Wailadmiki Shylla.