Jowai, Risaw 23: U Symbud Myntri Rangbah ka jylla u ma Sniawbhalang Dhar haka kren ïalap By-Election ïa u kyrtong ka Party u Dr. D.R.L Nonglait haka jingïalang paidbah bala pynlong ha madan Wahriong Mihmyntdu hynnin ka sngi 22 tarik u Risaw, uba pan ka jingkyrshah na ki paidbah ba kin jied ïa u MP uba don haka liang synshar jong ka sorkar jylla.
Shuh shuh ula pynsngew ki don ki Political Party kiba kular ban pynïoh kam ïaki khun samla hynrei ynda ki ïoh ban synshah kila beh kam pynban ïaki nongtrei napoh ka Council, wat ki khyrdop lum khajna kiba don naka 15 tylli kila poi mynta sha ka 30 tam, ula ong kaba eh ïa ki lada ki wan haka bor wat tang ban soi ruh kim tip hangno.
Ula pynsngew ïa ki project thymmai hapoh ka New Shillong (Area) kila kynjoh sha ka 20 hajar klur tyngka bad ki kam kila long kiba ïaidbeit shakhmat, haka liang ka kam jngohkai ka jylla kala kiew bha hapoh ka jylla ula ong lada kheiñ na ki nongwan shangkai ki don 7000 tylli ki kali kila ba rung shapoh ka jylla lada don tang 30 hajar ngut ki briew haka shisngi bad kin pynlut tang 1000 tyngka ka jylla kan ïoh nong haduh 3 klur tang shisngi, 90 klur shibnai bad 1080 klur haka shisnem.
Ha kaba ïadei bad ka project kaba heh bha kaba la kot sha ka 21,700 klur jong ka sorkar kmie ka Green Field high-speed corridor kaba na Umroi shaduh Ratacherra kaba 166 kilo miter bad kane ka prokek ka don haduh 80% hapoh ka Jaiñtia Hills, ong ma Dhar.
Ula kyntu ïa ki paidbah ban jied ïa u kyrtong uba ka party kala pynïeng u Dr. D.R.L Nonglait bad u briew uba don haka liang ka sorkar, nalor uba la don haka kyrdan pule bad ula pyndep haduh 10 tylli ki Degree, uba rung mynta sha ka kam Politic haka rta kaba 60 snem ban pynbha lang ïaka rukom treikam kaba long Uniform hapoh ka sorkar.
Ha kane ka sngi da ki hajar ngut ki paid nongkyrshan ka NPP kila wan tuid sha kane ka jingïalang jong u kyrtong ka NPP u Dr. D.R.L Nonglait uba la pynsngew ïa ki mat ki jura na ka bynta ka jingtreikam jong u bad ka party kata ban pynbha, ban tei bad ban pynshai.
