Nongpoh, Risaw 21: Hadien ka jingpyrshah jong ka Khasi Students’ Union (KSU) Umsning Circle ïa ka Puja Committee jong ka thain Zero-Point ban bret ïa ki Blei ha pung Nongmahir, kawei naki pung kaba itynnad bd kaba ju khring ruh ïaki nongjngohkai pyrthei, ki nongïalam bad ki dkhot jong ka seng ki la leit ban ap pahara ha katei ka jaka mynta ka sngi, khnang ban pynthikna ba ym don ba wan bret ïa ki Blei ha katei ka pung.
Ïa kane ka jingap pahara la lamkhmat da u President ka KSU Umsning Circle, Samla Lester Nongbet, ryngkat bad u General Secretary, Samla Laraplang Nongbri. La synran lang ruh da u General Secretary ka KSU NKHD Unit, Samla James Hitler Mawphniang, bad u Rangbah Shnong Nongmahir, Bah Elbin Ripnar.
Hynrei, katkum ka jingtip ba la ïoh, ka Puja Committee jong ka thain Zero-Point kam shym la wan ban bret ïa ki Blei ha Pung Nongmahir ha kane ka sngi, hadien ka jingpyrshah jong ka KSU Umsning Circle.
Kum ban shu pynkynmaw, ha u snem 2023, ka KSU Umsning Circle ka la pyrshah ïa ka Puja Committee jong ka Umsning ban bret ïa ki Blei ha Wah Umran Diary. Mynta pat, ka seng ka la pynpaw biang ïa ka jingpyrshah jong ka ïa ka jingbret ïa ki Blei ha Pung Nongmahir da ka Puja Committee na ka thain Zero Point.
Shuh shuh, ha kane kajuh ka sngi, ka KSU Umsning Circle ka la pynlong ruh ïa ka prokram thung dieng ha shi lynter jong ka pung Nongmahir, ha kaba ki nongïalam bad ki dkhot jong ka seng ki la ïashim bynta lang ban pynjyrngam bad pynitynnad ïaki sawdong sawkun katei ka pung.
Naka liang u Bah Lester Nongbet u la ong ba kum ka seng kala hiar mynta ka sngi hadien ka jingmaham naduh 5 bnai mynshuwa ïaki Puja Committee ban nym leit bret ïaki Blei ha katei ka pung Nongmahir namar ka jingpynkheiñ ïaki kyndon aiñ bad khamtam ka jingjaboh bad kum ka seng ka kwah ba ka jingbret blei ym dei shuh syndon ban pynlong ha katei ka pung namar ka dei kawei naka pung kaba itynnad bad kaba khring ïaki nongjngohkai pyrthei na kylleng bad ruh kadei ka pung kaba ju kyrshan ïaki paidbah nongshong shnong ha katei ka thaiñ.
Shuh shuh u la ong ruh ba kaba sngewsih ka long ba kitei ki Puja Committee kim shym la kren ne pan jingbit eiei halor ka jingleit bret blei jong ki bad khlem ka jingtip jong ka shnong, dei namarkata naka liang ka seng kala khang pyrshah syndon ba kim dei ban pynlong ïa katei ka pung kum ka jaka bret blei.
Naka liang u Bah Elbin Ripnar Rangbah Shnong ka Nongmahir u la ong ba ku ka shnong ka pynpaw ka jingsngewkmen kaba khraw ba mynta u snem la lait naka jingwan bret blei ki Puja Committee namar kane ka pung ka dei kaba ai jingim ïaki nongshong shnong lyngba ki kam jngohkai pyrthei, ka kam tong dohkha bad don ruh kiba pyndonkam ban sum ban sait bad wat ban dih bad lada kine ki Puja Committee kin wan bret Blei kan pynjaboh ïa katei ka pung bad kum ka shnong ka ai ka jingkhublei ïaka seng KSU, bad kumjuh ruh ïaki bor district kiba la shimkhia ban khang ïa ka jingbret blei ha katei ka pung.
