Hapoh ka sngi Balang ai por ki nongdie madan ban weng noh ïa ka Jingthoh ba ai u CEO Municipal

Shillong, Risaw 20: Ki nongdie jingdie harud surok jong ka nongbah Shillong ha ka sngi Balang ki la khot ïa ka jingialang ba kyrkieh hadien ba la ioh pdiang ïa ka notice ba kynsan na u Chief Executive Officer (CEO) ka Shillong Municipal Board (SMB) kaba pyntip sha ki ba kito kiba die jingdie na GS Road sha Motphran, Iewmawlong bad Jeep Stand ki la hap ban pynlait noh ïa ka jaka ba ki shong mynta ha u Naiwieng 25 tarik.Kane ka notice la phah ha ka 16 tarik mynta u bnai Risaw 2026.
Ïa kane ka jingialang ba kyrkieh la pynlong ha Khasi National Dorbar Hall, Mawkhar ha kaba baroh ki nongdie madan kila wan ban ia shim bynta ha kane ka jingialang.
Haba kren sha ki lad pathai khubor, Ka nongialam jong ka TUR (Thma U Rangli), ka kong Angela Rngad kaba kyrshan ïa ki nongdie madan ka la ong ba katei ka notice ka long kaba beaiñ bad ka jingbthah jubor tang da ki katto katne ngut ki riew shimet ha ka sorkar da kaba bynrap ba ki nongdie madan ha surok kin nym ailad ba ka sorkar ba kan don la ka jong ka bynta.
“Ki nongdie jingdie harud surok ki la rai ban dawa na ka sorkar ba kan weng noh mardor ïa kane ka notice,” bad bynrap ba la ai por shi taiew ban pynduh noh ïa ka.
Ka Kong Rngad ka la ong ba katkum ka notice ba la pynpoi da ka SMB, kane ka dei ka rai ba la shim da ka Provisional Town Vending Committee (PTVC), bad bynrap ba ki don napdeng ki nongdie madan kiba dei ki dkhot jong kane ka committee kiba tip ïa kaei kaba la iakren ha ka jingialang na ka bynta kito kiba die madan ha ki jaka na GS Road bad ki jaka ba marjan.
Ka PTVC kadei ban kitkhlieh ban ithuh ïa ki jaka ban shong die, ban pynlong ïa ki jingpeit bniah, bad ban ai ïa ki syrnod ban pynshisha ïa ki jaka ba ki shong die jingdie.
“Ngi kum ki dkhot ka PTVC ngim shym la pdiang satia ïa ka jingtyrwa na ka sorkar ban pynkynriah noh ïa kine ki nongdie madan sha ka jaka pynïeng kali ha Iew Mawlong”, ka la ong.
Katkum ka jingong jong ka ki nongdie jingdie kiba don ha ka PTVC kim ju shim rai beit beit, hynrei ki shim ïa ka jingïamynjur lang jong baroh ki nongdie jingdie kiba lah ban shah ktah na ka jingleh jong ki bor pyniaid.
Ka la bynrap ba ki jaka ba mynta na kiba ka SMB ka kwah ban pynkynriah ïa ki nongdie marbam ki dei ki “natural and heritage markets” ne ka “ïew ba la rim tam”, kum, Iewduh bad Iewmawlong.
“Ka ain ka ong ba ha kum kine ki iew ki nongdie jingdie kim pyrshah ban pynkynriah jaka”, la ong u Rangad da kaba bynrap ba la buh ïa ki jaka bad sawdong jong kine ki jaka.
Ka la ong ba wat hapdeng kum kine ki polisi, ki nongdie jingdie ha kine ki snem ki ïatreilang bad ki bor pyniaid da ka jingthmu ban pynduna ïa ka jingkhapngiah ha ka sor, hynrei ka dei ban long na ka bynta ka jingmyntoi jong baroh.
“Hynrei ha kane ka jingleh la pyndonkam bakla ïa kine ki nongdie jingdie”, la bynrap biang ka kong Rngad.
Katkum ka jingong jong ka ha ki snem kiba mynshuwa, ka municipality ka phah ïa ki trok jong ki bad ka pynkynriah jubor ïa kine ki nongdie jingdie bad ka shim noh ïa ki mar jong ki bad hadien ka jingialeh kaba jur la buh ïa ka ain hynrei mynta haba ka ain ka la treikam, mynta ki shah pynrem da kaba pyndonkam bakla ïa kajuh ka ain.
Ki nongdie madan harud surok ha Meghalaya ki trei kam kat kum ka aiñ jong ka Central Street Vendors (Protection of Livelihood and Regulation of Street Vending) Act, 2014.
Ka aiñ ka tehsong ban ai ka jingiada ïa ki hok, ki jingsurvey, bad ka jingpynbeit ïa ki nongdie jingdie ha sor.
Ka kong Rngad ka la kynnoh ba ka jingthmu jong ka sorkar ban pynkynriah noh ïa ki nongdie madan ba mynta na GS Road, Motphran bad ki jaka ba marjan, sha ka jaka ieng kali ha Iew Mawlong ka long tang ban buhrieh ïa ki sha jngai na ka pyrthei.
Ka la kdew ba ki nongdie madan harud surok ki la buh kham mynshwa ïa ka jingtyrwa ïa ka jaka ha Punjabi Line, sha ka sorkar.
“Haba kren bad ki bor pyniaid jong ka Cantonment Board, ban shna ïa ki godown na ka bynta jong ki, ki ïing bad ki iew ki hat na ka bynta ki nongdie jingdie, khnang ba ka jaka kan long kaba khuid bad ym kum kumba ka long mynta”, la kdew ka kong Rngad.
Katkum ka jingong jong ka, kawei pat ka jaka ba la tyrwa ha Lum Survey, kaba dei ka ktem jong ki kam beain mynta, na ka bynta kito kiba na GS Road, bad na ka bynta ki nongdie jingdie ha Iew Mawlong ka jaka ba la tyrwa da ki ka dei ka jaka Syndicate Bus Stop.
Ka la buh jingkylli, haba ka jylla ka ïakynduh ïa ka jingeh jong ka jingdheng kali, ka jingpyn kynriah ïa ki nongdie jingdie sha ka jaka ieng kali, shano pat ki briew kin pynieng ïa ki kali jong ki.