Shillong, Risaw 21: Ka jingpahara la nang pynkhlain shuh shuh ha baroh kawei ka nongbah Shillong hadien ba ki la don lai tylli ki jingshah kawang bom petrol kiba la jia ha Keating Road, Kenches Trace bad Laitumkhrah, ha kaba ki pulit ki la pynjur ïa ka jingpahara mynmiet ban ïada na ki jingjia ba sngewsih.
U Deputy Commissioner ka East Khasi Hills u Abhilash Baranwal u la ong ba ha kine ki jingjia ym shym la don kano kano ka jingmynsaw ne jingjulor ki mar ki mata.Ki pulit ki dang eksamin ïa ki dur khih jong ka CCTV kiba don ban lap ïa kiba donkti.
“Ki pulit ki dang tohkit ïa ki jingjia bad ki dang eksamin ïa ki dur khih na ki CCTV ban lum lang ïa ki sabut bad ban ithuh ïa ki nongleh kam sniew.Kat haduh mynta ym pat don ba kem iano ïano ruh”, la ong u Baranwal.
U la ong ba la pynkhlain ïa ka jingpahara da ka ba pynbun ïa ki pulit, ka jingleit ban peitngor bad ka jingpynkhlain ïa ka jingpahara miet, khamtam hadien shiteng miet, ha kaba la iathuh ba ki jingjia ki jia ha ka por mynstep.
Haba kyrpad ïa ki nongshong shnong ban long kiba jai jai, u Baranwal u la kyntu ïa ki nongshong shnong ban ïarap ban pynneh pynsah ïa ka jingïatylli bad ka jinglong jingman jong ka nongbah Shillong.
U la pynthikna ïa ki paidbah ba ki bor pyniaid district ka shim ïa ki lad ki lynti ban ïada na ka jingjia kaba kham jur bad ban pynneh ïa ka suk ka sain ha kylleng ka nongbah.
