Shillong, Risaw 21 : Ka Literature Ministry jong ka Youth Department, Balang U Blei (Meghalaya & Assam), Shillong, ka la pynlong ïa ka Writers’ Workshop ha ka 19 tarik Risaw 2026 bad ka Lympung Saiñdur ha ka 20 tarik Risaw 2026, ha JJM Nichols-Roy Memorial Building, Qualapatty, Shillong.
Ha ka Writers’ Workshop la ai jinghikai ïa ki nongthoh kiba dang sdang bad kiba don ka jingangnud ban long ki nongthoh, halor ki rukom bad ki buit thoh bapher-bapher, kynthup ïa ka jingthoh akademik bad kiwei pat ki jait jingthoh.
Ïa workshop la pynïaid da u Rev. A. Kharmyndai uba long u President jong ka Youth Department katba u Dr. M. M. Khymdeit, Associate Professor, Department of Khasi, North-Eastern Hill University (NEHU), Shillong, u la long u riewshemphang. La pynlong ïa kane ka workshop hapoh ka jingpynïaid jong u Dr. S. Kharsynteng kum u Convener, bad la wanshim bynta da kumba 100 ngut ki samla na kylleng ka ri Khasi bad Jaiñtia.
Ha ka 20 tarik Risaw 2026, ka Literature Ministry ka la pynlong ruh ïa ka Lympung Saiñdur halor ka phang, “Ka Balang ha ka Mynta: Ki Jingroi, ki Kyrpien bad ka Jingjam Shakhmat.” Ïa ka jingïalang plie la pynïaid da u Rev. A. Kharmyndai, katba ïa ka jingkren maitphang la ai da u Rev. Dr. R. G. M. Sohkhia.
Ha kane ka lympung, la wanrah bad ïatai ïa hynñiew tylli ki paper halor ki mat bad ki jingeh bapher-bapher kiba ïadei bad ka Balang, kynthup ïa ka FCRA, ka jingshakri paidbah, ka Sunday School, ki jinghikai niam, ka bynta jong ki samla bad ka mishon jong ka Balang ha kane ka juk. Ïa ki jingïatai la shongknor da u Dr. P. S. Rani, bad u Dr. A. W. Rani u la long u Convener jong kane ka lympung. Kumba 80 ngut ki nongshim bynta na ri lum Khasi bad Jaiñtia ki la wan ïashim bynta.
Kine ki artylli ki prokram ki la long ki lad ban kyntiew ïa ka sap thoh, ban pynriewspah ïa ka jingtip bad ka jingïatai, bad ban pynshlur ïa ki nongthoh bad ki dkhot jong ka Balang ban pyrkhat bad ïamir jingmut halor ka bynta bad ka lawei jong ka Balang. Ïa kine ki prokram la kyrshan bad bei bai lut da ka Youth Department jong ka Balang hapoh ka jingpeit jong u Rev. M. Suja kum u Executive Secretary.
