Nongpoh, Risaw 21: Ha ka sngi kyrpang jong ka jingkynmaw ïa ki pulit kiba la duh noh ïa la ka jingim ha ka jingshakri paidbah, kaba la tip kum ka Police Commemoration Day, ki pulit ka Ri-Bhoi ki la pynpaw ïa ka jingsngew burom bad ka jingsngewnguh ïa baroh ki pulit kiba la aiti ïa la ka jingim ha ka por ba ki dang pyndep ïa la ki kamram.
Ïa kane ka jingkynmaw burom la pynlong ha phyllaw ka ophis u Superintendent of Police ka Ri-Bhoi haka jingdonlang u Giri Prasad kum u heh duh ki pulit ka Ri-Bhoi, ki pulit ophisar lem bad ki bahaiing hasem jong kito ki pulit kiba la khlad bad aiti ïala ka jingim.
Ki pulit ka Ri-Bhoi ki la pynpaw ruh ïa ka jingsngew burom kaba khraw ïa kine ki nongshakri kiba la aiti ïa la ka jingim na ka bynta ka jingshngaiñ bad ka jingsuk jong ki paidbah, da kaba ban jur ba ka jingaiti bad ka jinglen lade jong ki kan sah jingkynmaw junom.
