Lyngba ka CPI bad ka tnat SPI; Poi kyrdan ba 5 ka jylla ha ka jinghiar ki dor ki mur kaba dei kaba duna tam da kumba 3.59% ha u Nailur

Shillong, Risaw 20: Ka Meghalaya ka la ïoh ïa ka kyrdan kaba san ha ka jinghiar ki dor ki mur kaba dei kaba duna tam da 3.59 percent ha ka ri baroh kawei na ka bynta u bnai Nailur, kaba long ruh kaba duna bha ïa ka jingkiew dor jong ka ri baroh kawei kaba long 5.54 percent.
Ïa ka jingtip ba shipor jong ka dor marbam la pynmih da ka provisional consumer price index (CPI) bad ka tnat Union Ministry of Statistics and Programme Implementation (SPI) jong ka sorkar pdeng.
Tang ar tylli ki jylla (baroh ar ha ka thain shatei lammihngi) bad kawei ka thain (Delhi) ki la kham duna ka jingkiew dor ha u bnai ba la dep. Kitei ki ar tylli ki Jylla ki long ka Mizoram (2.85 percent) bad ka Nagaland (3.22 percent). Ka jingkiew dor jong ka Delhi ka long 3.40 percent.
Ka jingkiew dor jong ki nongkyndong ha Meghalaya ka long 3.72 percent, katba ha sor ka long 3.22 percent.
Ki jingkheiñ ki ïanujor ïa ki dor ha u bnai Nailur 2026 bad ki dor ha kajuh ka bnai jong u snem ba la dep.
Ka dor jong ki nongthied nongpet ha Meghalaya baroh kawei ka long 107.69, ha kaba ki nongkyndong ki long 108.17 bad ha sor ki long 106.32.
Ka index ka buddien ïa ki jingkylla ha ka dor jong ki song ha ka kriah jong ki mar bad ki jingshakri ba la pyndonkam da ki longïing.
Ha ka kyrdan jong ka ri, ka jingkiew dor jong ki marbam ka la kiew da 7.74 percent ha u bnai Nailur, haba ïanujor bad 5.97 percent ha u bnai Nailar.
Ka dor jong u Piat ka la kiew na ka snem sha ka snem kaba long 108.09 percent, katba u sying u la kiew da 62.85 percent, u rynsun da 54.62 percent bad u sohjew 36.41 percent.
Ka jingkheiñ jong ka ri ka pyni ruh ïa ka jingkiew dor kaba 9.36 percent ha ki jingshakri ha ki jaka bam bad ki jaka sah, katba ka jingsumar shimet bad ki mar bad ki jingshakri bapher bapher ki kiew da 13.75 percent na ka snem sha ka snem.