Dei ka mynsiem ba kwah shakri ngi rung sha ka NPP khlem ki kyndon : Bah Paul Lyngdoh

Shillong, Risaw 19 : U MLA ka West Shillong bad u nongïalam barim ka UDP, u Bah Paul Lyngdoh, u la pynshai ba ka jingpynïasoh jong ki lai ngut ki MLA ka UDP sha ka National People’s Party (NPP) ka long khlem kano kano ka kyndon, bad ka jingthmu ka long ban pynbha bad pynjanai shuh shuh ïa ka jingshakri ïa ka jylla.
Ïa kane u Bah Paul u la ong haba kren bad ki lad pathai khubor hadien ba ki la dep ban aiti ïa ki kot ki sla sha u Lamphang ka Iing Dorbar Thawain ka Jylla, u Thomas A Sangma ban pyntip ba ma ki baroh lai ngut ki MLA ba kynthup lang ïa u Bah Renikton Lyngdoh Tongkhar kumjuh u Bah Nujorki Sungoh, ba ki la rai ban pynïasoh pura noh sha ka NPP.
“Kane ka rai ka la mih na ka jingïasngewthuh lang jongngi baroh lai ngut kum ka kynhun,” u la ong.
Shuh shuh u la ong, “Ym shym la buh kano kano ka kyndon. Ka jingpynïasoh ka long khlem kyndon, katkum ka rai lang jongngi kum ka kynhun baroh lai ngut. Ngi sngewthuh ba ka NPP ka ai ïa ka rynsan kaba biang tam ban pynurlong ïa ka jingshakri kaba ngi kwah ban ai sha ka jylla.”
Nangta haba jubab halor ka jingkylli la u dang don neem ka jingatnud ïa ka UDP na ka liang u Bah Paul u la jubab ba um don satia ka jingbitar ïano ïano ruh.
Nangta haba kylli halor ki jingkren jong u ha kine ki sngi ba la dep pyrshah ïa u President ka UDP, u Bah Metbah Lyngdoh u Bah Paul u la ong ba u la ju pynpaw ba u kren katkum ki jingshisha bad ki jingkheiñ ym na ka jingsngew shimet.
Ha kajuh ka por haba kren pat halor ka mat kaba ïadei bad ka shuki Myntri Sorkar, u Bah Paul u la ong ba kane ka bynta ka shong ha ka rai jong u Myntri Rangbah ban shim. Katkum ka jingong jong u na ka liang u Myntri Rangbah um shym la ai kano kano ka dak halor ka jingpynkylla ïa ka kynhun Myntri.
U Bah Paul haba jubab biang ïa ka jingkylli la u sngewdei neem ba u President ka UDP un bteng ban bat ïa ka shuki Myntri hadien ba ka party ka la duh haduh 11 ngut ki MLA, ka jubab kaba u ai ka long, “Ka jingweng ne pynneh ïa ki Myntri ka shong ha u Myntri Rangbah ngam don ei ei ban kynthoh halor kane.”
Haba batai ïa ka daw jong ka jingmih noh na ka UDP, u Bah Paul u la ong ba ym tang ma u, hynrei baroh 11 ngut ki la iehnoh ïa ka party.