Mairang, Risaw 19: Wat la ka aïom khlong sohphlang ka shim por sa kumba shibnai ei ei hynrei ki don ki nongrep soh phlang na ki katto katne ki shnong kiba hap ha Eastern West Khasi hills district kiba la sdang ban khlong na ka bynta ban die.
Ka kam rep soh phlang kadei ka ba myntoi haduh katta katta bad na pdeng ki mar rep baroh u soh phlang u dei u ba rem dor bha kham tam eh ha une u snem.
Haba phai sha ki shnong kiba ka surok bah National Highway 44 (E) Shillong – Tura ka ïaid lyngba dei tang ha ki bynta kiba hap ha ka shnong Mawroh ba ki basa die soh phlang ki don da ki spah tylli ha baroh arliang ka surok.
Ha kine ki sngi la lap ba ki basa die soh phlang kim pat da bun namar ki dang shu sdang ban shna ha ka taïew ba la dep bad ba ki dang don tang katto katne ki nongrep kiba la sdang ban khlong.
Ha kine ki sngi la ïoh ban ïakynduh ïa ki katto katne ngut ki nong shong shnong na ka shnong Mawroh kiba shong die sohphlang ha ki sem ba ki la dep shna ha rud surok bad haba kylli ha ka dor katno ki die ïa u soh phlang ki la ïathuh ba ha kine ki sngi ka dor ka poi saw spah tyngka shi kilo.
Nalor kata ki la ïathuh ruh ba ha une u snem u soh phlang um da long bha nalor kata ka jingïap stem ruh ka jur bha khamtam ha ka por ba u dang sdang ban phuh syntiew.
Haba kylli pat katno kilo ki lah ban die ha ka shi sngi ki la ong ba ka jing lah die ka shong kat kum ka por lada dei ka por ba ki nongleit nongwan ki bun te ki lah ban die san haduh hynriew kilo shi sngi hynrei lada ki nongleit nongwan ki duna ka jinglah die ruh ka duna.
Shuh shuh ki don kiba shong ha kitei ki sem kiba ïathuh ba kim shym rep da lade hynrei ki shu leit thied na ki para nongshong shnong.
Haba kylli pat ba lada ki shu leit thied na ki para shnong kit hew kilo ne kit hew da ki kriah ki la ïathuh ba ki thew ha ki tin litar bad ki don kiba pynkhuid hi bad ki don ruh ki shu die khlem da pynkhuid.
Shuh shuh ki la ong ba ïa uba la dep pynkhuid ki die kham rem hynrei ïa u bym pat pynkhuid pat ka dor ka kham tad namar ba ki nongdie ki hap ban pynkhuid hi bad ka shim por bha ban pynkhuid.
