Lyngba kine ki lympung, kiew stet ka jylla ha ki kam ïalehkai bad ki kam jngohkai pyrthei: Bah Wailadmiki

Shillong, Risaw 18 : U Myntri ka tnad Sports ka Sorkar Jylla, Bah Wailadmiki Shylla ha ka sngi Saitjain u la ai ka jingïaroh kaba khraw ïa ki bor pynïaid ïa ka jingïakob niah kali ha ki lum ki kwah bad ki jaka um namar u ong ba dei lyngba kine ki lympung ba ka Jylla kan kiew stet lang ha ki kam ïalehkai bad kumjuh ha ki kam jngohkai pyrthei ha ka jylla.
Haba kren bad ki lad pathai khubor ha ka lympung ïakob niah kali ba pynlong da ka AHOR 4×4 Off-Road Challenges ha ka sngi Saitjaiñ ha Mawsadang, u Myntri u la ong ba ka jingpynlong ia kum kine ki jingïakob ym tang ba ki khring ïa ki nongwan peitkai ban wan peit ïa ka jingïakob niah kali hynrei ka long ruh ha kajuh ka por ka lad ïa ki paidbah ban ïohi ruh ïa ka jingitynnad ka mei mariang kaba don ha katei ka thain.
“Haba don kum kine ki lympung ïalehkai, ki don ruh bun bha ki nongïalehkai na shabar jylla kiba wan ban shim bynta. Da ka jingwan jong ki kan ïarap ïa ka kam jngohkai pyrthei ha ka jylla jongngi namar lyngba jong ki, ki paidbah kin sa tip kham bun shuh shuh ïa ka jingriewspah ka mei mariang ha ka jylla jongngi,” ong u Myntri.
U Myntri u la ïathuh ruh ba ka sorkar jylla ruh ka snohkti lang ha kum kine ki lympung la ka long naduh ka tnad Tourism bad kumjuh ka tnad Sports namar kine ki ïaid ryngkat ryngkat ban kyntiew ïa ka jylla.
Ha kajuh ka por na ka liang u Vice President jong ka AHOR, Bah Ferdinand Kharkamni u la ong ba ki sngewkmen haduh katta katta ban sakhi ïa ka jingtuid jong ki paidbah kiba wan sha katei ka lympung ïakob niah kali kaba lai sngi.
U la ong ruh ba ha ka juk social media mynta, bun bha ki briew kin sa tip bad kin sa wan kai sha Mawsadang ban sakhi ïa ka jingitynnad ka mei mariang, khamtam ïa ka jingkhuid ka um bad ka jingshngain ban ïalam kai ïa ki khun namar ka jingshngain ka jaka.
Shuh shuh u la ong ba lyngba katei ka lympung ba ki pynlong, mynta ka la plie ruh ka lad ïa ki nongshong shnong ban phaikhmat pat kumno ban ïoh kamai na ka kam jngohkai pyrthei.
Ha kane ka sngi la sakhi ruh ba bun ki paidbah ki pynlut por ban shong lieng ha ki wah kiba don ha jan bad katei ka jaka ïakob niah kali bad don pat kiba leit ban kiew kai sha ki lum ba kynjang bad pyngad kiba don ha ki bynta ba shaneng jong katei ka jaka ïalehkai.
Ha kane ka jingïakob, la sam ruh ïa ki khusnam sha ki nongjop ha ka jingïakob ñiah kali off-road ha ki kyrdan Stock, Semi-Modified, Modified bad Pro-Modified, ha kaba la sam ruh ïa ki khusnam Best Driver bad Best Co-Driver.