Jowai, Risaw 14: Ka Pnar Student Movement (PSM) Central Body mynta ka sngi 14 tarik u Risaw hapoh ka jingïalam u President Rangbah u Embhah Passah bad u General Secretary u Wompher Wann ha ryngkat ki dkhot jong ka, kila leit ban kynduh ïa u myntri ka koit ka khiah jong ka sorkar jylla u ma Wailadmiki Shylla bad ka seng kala ïoh lad ban aiti ïa 2 tylli ki Memorandum.
Kaba nyngkong ka seng kala dawa ban buh kawei ka MCH Hospital ha East Jaiñtia Hills District khnang ban pynsuk ïa ki paidbha jong katei ka thaiñ ban ïoh ïaki lad jingsumar. Kaba ar ka seng kala dawa ban pynheh ïa ka MCH ha Jowai na ka 100 jingthiah sha ka 200 jingthiah katkum ka jingdonkam jong ki paidbah mynta.
Haka jingïakren bad u myntri ka seng PSM kala ïoh ban pynsngew ïa kitei ki mat jingdawa ba donkam jong ki paidbah kiba leit wad jingsumar na ka Hospital MCH ha Jowai, namar kumba long mynta katei ka Hospital kala don haka jingkhapñiah bad hap ban shakri baroh kawei ka Ri-Lum Jaiñtia, da kaba ong kiba bun ki briew kiba duna ka ïoh ka kot ki shem jingeh ban leit sha ki jaka sumar (Private Hospital).
Naka liang u myntri ula kular ban shimkhia ïa kane ka kam ban pynheh (extension) ïa ka MCH Hospital Jowai bad ban pynsuk ïa ki paidbah, ula pyntip ruh kumba long mynta la dep ban sanction pisa na ka bynta ban pynheh ïa katei ka Hospital.
Halor kane ka PSM kala lyrpad jur na u myntri ban pynkloi ïa kane ka kam katba lah, la ong ruh ka jingbiang jong ki Hospital sorkar, ki Doctor bad ki Nurse ha baroh ar tylli ki District kan pynsuk shibun eh ïa ki paidbah ka thaiñ.
Sa kawei ka khubor kaba sngewtynnad ka long ba u myntri ka koit ka khiah ula pynsngew ba ka sorkar kala peit bniah ban kyntiew kyrdan ïa ki CHC kiba don haki Sub Division bad haki Block Development.
Katba ha kaba ïadei bad ka jingdawa ban buh ïaka MCH ha East Jaiñtia Hills ki dang peit bniah shwa ïa ka jaka kaba biang, namar wat tang ka Civil Hospital kaba don ha Khliehriat ka dang don hapdeng ki jingpynbit pynbiang kumba long lem kiwei pat ki District.
