Shillong, Risaw 13: U Myntri Rangbah ka jylla Meghalaya, u Conrad K. Sangma u la ïakren bad ka kynhun kaba nyngkong eh jong ka Chief Minister’s Leadership in Education and Development (CMLEAD) Fellowship ha kane ka jingrakhe jingïalang kaba la long ha ka sngi baar ha ïing jong u ha nongbah Shillong.
Ha ka sngi kaba pynrungkam, u Myntri Rangbah bad u Myntri ka pule puthi, u Bah Lahkmen Rymbui kila aiti ïa ki laptop sha ki nongshim bynta.
Haba kren shaphang kane ka CMLEAD Fellowship, ka dei kawei na ki kynhun kaba thmu ban pynkhlaiñ bad pynkylla dur ïa ka rukom pule puthi ha ka jylla da kaba pynïasoh bad pyntreikam ïa ki samla kiba nang ba stad ha ki tnad pule puthi. Katba ïa ki nongïashim bynta, kin shah buh sha ki 12 tylli ki distrik bapher bapher jong ka jylla Meghalaya.
Kin sa ïatreilang ryngkat bad ka Samagra Shiksha, ka Directorate of Educational Research and Training (DERT) bad ki ophis jong ka pule puthi ka distrik ba kin kyrshan ïa kane ka jingpynwandur, ka jingpyntreikam ïa ki sienjam ba hakhmat kiba thmu ban pynjanai ïa ki jingmih na ka jingpule jong ki khynnah skul.
Haba batai shai shaphang ka kam ba leh kine ki nongïashim bynta kane, u Myntri Rangbah u la ong ba ka synshar khadar kam dei tang shaphang ka politik, ka rukom treikam sorkar lane ka jingtreikam ki kam synshar ha ki ophis sorkar. U la ong ba ka jingïashim bynta lang na ka imlang ka sahlang, ka jingïashim bynta lang ka shnong ka thaw ka long kaba donkam, ha kaba ka long ban bishar la ka sorkar ka lah ne em ban pynurlong ïa ki thong ba shisha jong ka.
U Conrad u la pynshai ba ki nongïashim bynta ki long ka lad na ka bynta ki samla ba kin ïoh jinghikai ba nyngkong ban shakri ïa ka kam paidbah, kan long ruh ka jingshem kaba u pynïasyriem bad ka kam ba hikai ne kam trai hapoh sorkar, ym hapoh ka karkhana ne kompany.
U Conrad u la kyrpad ïa ka tnad pule puthi bad kan ai ïa ka kynhun kita ki kam ba biang, ki jingthmu bad ki rukom ai jingtip, kaba ym dei tang bad ban ïaid bad ka laptop khlem jingkitkhlieh bad khlem ka phang kaba shai. U la ai jingmut ruh ba katba lah, man uwei pa uwei u dei ban leit jurip sha man kawei pa kawei ka skul ha ka shi taïew bad pyni ïa ki kaiphod ïa kaei kaba ki la dep treikam.
Kane kan kynthup ïa ka jinglong jingman ki jaka pynjhieh, kaba mut la ka jong na ka bynta jong ki kynthei, ki ïing maw, ki jaka shna ïa ki shuki bad ka rukom long ka jingpule puthi, kaba dei ka jingïoh ïakren bad ki khynnah pule. U la bynrap da kaba ong ba ka tnad ka dei ka jaka ba biang ban pynskhem bad pynkut ïa ki dak ki shin.
Nalor ki kam jong ki, u Conrad u la pynshlur ïa kine ki nongïashim bynta ba kin pynshongshit ïa ki shnong ki thaw hapoh kine ki distrik. Ha kaba ki skul ki don bun ki jingduna, hynrei u la ai jingmut da kaba kin leit ïakynduh ïa ki rangbah shnong, ki pastor, khynnah pule, NGO ba kin leit jurip sha ki skul man ka sngi, ïashim bynta kumba ar ne lai kynta, hikai ïa ka sobjek English, lane pynbit pynbiang ïa ka skul.
U la ong ba ym dei ban shu khmih ïa ki jingeh kum ka jingïakhun, hynrei peit kum ka kata ka lad na ka bynta jong ki ba kin lah ban leh eiei ban pynkylla ïa ka bad u la kitbok kit rwiang ïa kine ki nongïashim bynta ba kin noh synniang sha ki bynta jong ki kam pule puthi bapher bapher.
