Ïathuh u Myntri ïa ka jingangnud ka sorkar ban pynskhem ïa ka bynta jong ka skul DDGLPS

Shillong, Risaw 13: Ka Dangar Dombah Government Lower Primary School ka la pynhap pyrda noh ïa ka jingrakhe ïa ka jingdap 50 snem jong ka, kaba long ruh ka jingsah jingkynmaw ha ka jingdap 50 snem jong ka jingnoh synniang ha ka liang jong ka pule puthi bad ka jingsan jingroi ki khynnah pule ba nyngkong.
Ha kane ka prokram u Myntri ka tnat pule puthi, u Bah Lahkmen Rymbui u la don lang ha katei ka jingrakhe bad u la pyllait ïa ka kot thoh sah jingkynmaw jong ka jingdap 50 snem katei ka skul, kaba long ruh kum ka jingthoh shaphang ka histori kane ka skul, ka jingjop bad ka jingleit jingwan ha kine ki sanphew snem ba la leit.
Ha katei ka prokram, la donlang u Bah H.M. Shangpliang, nongaiktien jong ka sorkar Meghalaya lyngba ka tnad pule puthi, u Rev. R.M. Thongni, Principal jong ka Riwar Secondary School, Dangar; u Rev Fr. James Mawa, Principal ka St. Peter’s Higher Secondary School, Dangar; uba pynïaid ïa ka skul; u rangbah shnong ka Dangar; nongmihkhmat jong ki katto katne ki shnong ba jan bad kiwei kiwei ki nongseng kam la jong, ryngkat ki kmie ki kpa, nonghikai bad ki khynnah pule.
Katba ki nonghikai barim ki la sam ïa ki jingsah jingkynmaw jong ki bad kaba phaidien bad pyrkhat halor ka jingroi bad ka lynti ïaid jong kane ka skul ha kine ki san phewphew snem kiba la dep. Kane ka skul kaba la lah ban pynrung kyrteng 290 ngut ki khynnah skul ka dang ïaineh ban pynbiang ïa ka jingnang jingstad kaba radbah ïa ki khynnah ha kane ka thaiñ.
Ha katei ka prokram, u Bah Lahkmen Rymbui u la ban jur halor ka jingtrei shitom jong ka sorkar ban pynskhem ïa ka bynta jong kane ka skul lyngba ki jingtei ba paka jong kane ka skul, ka jingkyrshan jong ki nonghikai bad ka lad ban pynïoh ïa ka jingbiang ka pule puthi ki khynnah skul. U la ong ba ka sorkar ka la kular ban pynïoh ïa ka pule puthi bad pura bad ai lad ïa ki khynnah pule ba kin pynroi ïa ka jinglah jong ki.
U Bah Rymbui u la ai jingïaroh ïa ki nonghikai na ka bynta ka jingtrei shitom jong ki ha ka ban ai jingnang jingstad bad pynheh pynsan ïa ki khynnah skul. U la pdiang ïa ka jingnoh synniang jong ka jingpynïaid ïa kane ka skul da ka School Management Committee bad u la ai khublei ïa ki kmie ki kpa na ka bynta ka jingshaniah jong ki ïa kane ka skul.
Katba u Bah Shangpliang u la kren shaphang ka jingdonkam jong kane ka skul bad ki mat ba kongsan bad u la ban jur halor ki jingdonkam jong ka jingïatreilang jong ka sorkar, ki nongpynïaid kane ka skul, ki kmie ki kpa bad ka imlang ka sahlang ba ïar. U la kyrpad ïa ki nongseng kam lajong ba kin kyrshan ïa kane ka skul ba kan ïai bteng ïa ka jingïaid lynti jong ka pule puthi kane ka skul.
Ki khynnah pule kila pyni la ki sap jong ki da kaba ïa shad ïa ki jingrwai tynrai kum shi bynta jong ka jingrakhe, da kaba bynrap ïa ka jingpynshongshit ne pynkhraw shuh shuh ïa ka rukom rakhe ïa ka jingdap 50 snem kane ka skul.
Kane ka jingrakhe ka long kum u mawjam ba pynsah jingkynmaw ïa ka histori jong ka Dangar Dombah Government LP School, da kaba rakhe ïa ka jingnoh synniang ha kine ki 50 snem bad pynthikna ïa ka jingkut jingmut jong ka sorkar, ki kmie ki kpa bad ka imlang ka sahlang ha ka ban pynskhem ïa ka pule puthi bad ban thaw ïa ki lad ki lynti kiba kham bha na ka bynta ki pateng ban wan.