Shillong, Risaw 13: Ka Frank Yamaha ha ka sngi Baar ka la pynlait paidbah ïa ki thuk thuk arshaka kiba thymmai kiba la ithuh da kum ka Yamaha New YZF R2 R instinct Race.
Kine ki bike bathymmai ki YZF R2 ki dei ki bike da ka kyrdan kaba thymmai kiba don haduh 6 gear bad kidei ruh ki model thymmai bad kiba lah ban ïaid sted.
Ïa kine ki bike la pynlait ha Showroom jong ka Frank Yamaha kaba don ha Mawïong bad kine ki bike kiba don la ki jong ki jong ki rong ki poi ka dor kumba T. 2 lak, 32 hajar tam napoh Showroom.
Ha kane ka sngi la wan ban ïashim bynta lang da ki seng jong ki kynhun ñiah thuk thuk bapher bapher jong ka nongbah Shillong bad jong ka jylla hi baroh kawei bad ha kane ka sngi ka la don ruh ka jingkyntip halor ka model jong ka bike, bad kiwei ki jingkyntip ha kaba kiba la ai ki jubab kiba dei ki la ruh ki khusnam ba la sam da ki nongpynïaid jong ka Frank Yamaha.
Ka la don ruh ka jingailad ban pyrshang ïa kine ki thuk thuk ha kaba na ka liang ki dkhot jong ki seng ñiah thuk thuk bapher bapher ki la ïoh kane ka lad bad pynpaw ruh ba kane ka model ka long shisha kaba biang khamtam ha ka jinglah ban ñiah sted bad kumjuh ruh ban lah ban leit jingleit shajngai ruh ka long kaba sngewsuk bad kaba ïahab bha.
