Nongpoh, Risaw 12 : U Myntri Rangbah ka jylla u Conrad K Sangma mynta ka sngi u la buh mawnongrim ban tei ïaka Mini Secretariat ha Patharkhmah ban buh ïa ki ophis sorkar bapher bapher hapoh ka Patharkhmah Civil Sub-Division ha kawei ka jaka.
Ïa kane ka Mini Secretariat la mang pisa haduh T.17.76 klur bad kane ka projek kan ïarap ban pynsuk ïa ki paidbah ban ïoh ïa ki jingshakri jong ka sorkar, bad kumjuh ban pynsuk ïa ki paidbah ka thaiñ Jirang Constituency ba kim donkam shuh ban leit shaduh Nongpoh naka bynta ka jingdonkam haki ophis sorkar bapher bapher, hynrei ki paidbah kin ioh ka jingshakri jong ka sorkar ha katei ka Mini Secretariat.
Naka liang u Bah Sosthenes Sohtun MLA ka Jirang ba dei ruh u Myntri Sorkar ka jylla u la ai ka jingkhublei ïa u Conrad Sangma u ba la sngap ïaka jingkyrpad bad ka jingdonkam jong ki paidbah ka thaiñ Patharkhmah bad lyngba kane ka Mini Secretariat kaba la sdang ruh shaid shaid ïaka kam kan long shisha ka jingmyntoi bad ka jingkyrkhu ïaki paidbah ka thaiñ Jirang baroh kawei ha kaba ïadei bad ki jingshakri jong ka sorkar lyngba ki ophis treikam bapher bapher.
