Pynshlur ka SPSWAS ïa ki samla pule ban pynleit jingmut ha ki jingpule ban ïakhun ïa ki eksam UPSC

Shillong, Risaw 12: Ka Siamsinpawlpi, Paite Students Welfare Association Shillong (SPSWAS), ka la pynlong ïa ka jingïalang kaba 63 jong ka Annual Conference-cum-Freshers Meet 2026 ha OAK Banquet Hall, Laitkor, Shillong ha ka 10 tarik mynta u bnai.
Ha kane ka jingïalang la ïashim bynta da ki spah ngut ki samla pule bad ki kmie ki kpa ryngkat ki nongmihkhmat na ka Mizo Student Union, Kuki Students Organisation, Zillai, Vaiphei Students Organisation, Khangthah Junpawl, Simte Students Organisation bad Tedim Chin Students Association.
Ha kane ka prokram la kynthup ïa ki jingduwai u pastor na ka bynta ki samla pule ba dang thymmai, ka jingduwai na ka bynta ki mynsiem ba la khlad noh kiba la noh synñiang sha ka Siamsinpawlpi, ka jingpynïasoh lang ïa ka kolshor da ki Zomi Edmundians bad ki Zomi Anthonians, ka jingpyni riam tynrai jong ki khynnah, ka khusnam ba tbit, ka khusnam nongnoh synniang, ka khusnam jong ka jingtbit, ka khusnam jong ka jingjop shynrang bad thei bhabriew bad ka jingrwai, ka Good Samaritan Award, ki jingrwai jingtem bad kiwei kiwei
Ïa kane ka prokram la pynïahap da u Nungak Deihching bad u Sonlian. La ïalam ïa ka Invocation da u Upa G Lianbiakthang, ka jingpule lyngkot da u Vice President u Pu Thangmuansang, ka jingkren ai khublei na u president Pu Khamthianmung, ka jingpynpaw jingsngewsih ïa ki dkhot kiba la khlad noh da u Dr Khamsuanthang bad ki jingduwai pastoral na u Pastor T Daikhankhup jong ka EBC Shillong.
U Kongsan u Pu Pauzakham Ngaihte, IRS, Additional Commissioner, Customs and Indirect Taxes, u la kyntu ïa ki samla pule ba kin pynleit jingmut ha ka jingwad bniah bad jingpynroi, ka jingwad bniah ha ka kam engineering bad ka jingwad bniah ha ka liang ka saian, da kaba ong ba ka imlang sahlang ka dang sahdien ha kine ki bynta.
U la pynshlur ïa ki samla pule ban thmu leit ïakhun ïa ka UPSC bad ai jingmut ïa ki kmie ki kpa ban pynshlur ïa ki khynnah ban pule bad ngam jylliew ha ka jingnang jingstad, ym tang ban pule shitom ïa ki bym dei ne kyntiew ïa ki jingim, da kaba bynrap ba ka jingminot bad ka jinglong beit ki long ki shabi jong ka jingjop.