Wat ba ka jingpyntrei ïa ka Tura Medical College ka la poi 84%, yn dang shimpor ban plie bym ïoh nonghikai

Shillong, Risaw 11: U Commissioner bad Secretary sha ka Sorkar Meghalaya, ka tnat Health bad Family Welfare, u la khot ïa ka jingïalang ban peit ïa ka jingïaid shaphrang halor ka jingpyntreikam ïa ka Tura Medical College. La pdiang sngewbha ruh ha katei ka jingïalang ïa ka Dr Balatalin Lyngdoh, kaba shah thung thymmai ha ka kam kum ka Director of Health Services Medical Education and Research.
Ha katei ka jingïalang, la ong ba ka jingpyntreikam ïa katei ka projek ka la long 84 persen, kaba la don 80 tylli ki jingthiah kyrpang bad 150 tylli ki jingthiah katei ka hospital block kaba hap hapoh ka Civil Hospital, Tura ka la long 59 persen bad 25 persen kumjuh.
Katba ïa ki hostel bad ki quarter jong ki nongtrei Type-5 ha Doldagre, la ong ban pyndep shwa ka 31 tarik u Nohprah 2026, hynrei ïa ka academic block yn pyndep shwa ka 31 tarik Lber, 2027 bad ïa ki quarter ba sah jong ki nongtrei kita ki Type 2,3 bad 4, yn pyndep hashwa ka 30 tarik Jylliew 2027. Ïa ka hospital block ba don 80 tylli ki jingthiah, la khmih lynti ban pyndep shwa ka 31, Nohprah, 2026 bad ïa ki 150 tylli ki jingthiah block hashuwa ka 30, Jylliew, 2027.
La ong hangne ba watla pynbiang lut bad ka jingtrei shitom, hynrei kane ka jingpyntreikam jong ka kolej ka ïai don bun ki jingduna kynthup ïa ka jingduna ki nonghikai haba ka tnad ka la dep pynmih haduh lai sien lai wat ïa ki kam ba lait.
La bynrap ba ha ki san bnai ba la dep, ki doktor kiba trei ha Garo Hils kila ïatreilang ryngkat bad ka tnad ha ka jingpynbiang ïa ki doktor ki ban trei ha Tura Medical College, ha kaba kine ki doktor mynta kila trei ha ki Primary Health Centres, Health and Wellness Centres bad ki hospital, khamtam ha Ri Lum Garo bad shabar jong ka West Garo Hills.
Lada don kano kano ka jingweng ïa ki doktor, yn pyn thikna ba yn nym don kano kano ka jingthut ha kaba ïadei bad ka jingtreikam ha ki jaka sumar ha kiwei kiwei ki district jong ka Garo Hills. Watla dep pynlong ïa kane ka jingtreilang kaba hadien san bnai, ka jingduna ïa ki 97 tylli ki kam nongseng hikai kiba la bthah da ka National Medical Commission (NMC) na ka bynta ka jingrung u paidbah kumba 50 ngut ki khynnah MBBS kaba la sah 86% na ki Professor bad 85% na ki Associate Professor.
Dei ban don 52% na ka bynta jong ki Senior Resident bad 36% ki Assistant Professor, lem bad ki kam ba lait na ka bynta jong ki post ba heh kyrdan, kaba long ka jingeh kaba khraw ban pynbiang ïa ki jingdonkam jong ka NMC tang ban ryngkat bad ki jingpyrshang thung kam kiba mynta.
Kane ka jingïalang ka pynpaw ïa ka jingsngewkhia ba man u snem pule ha kaba katei ka kolej kam treikam, kawei ka kynhun ba pura jong ki jaka pule MBBS ka jah noh na ki khynnah pule jong ka jylla. Ka Tnad ka koit ka khiah bad jingkoit jingkhiah ka sorkar pdeng ka la mang kyrpang ïa ka Tura Medical College na ka bynta ka jingrung kaba 150 ngut ki khynnah man u snem, hynrei haduh mynta ym pat lah ban pynbiang ïa ki nonghikai wat tang na ka bynta ka jingrung 50 ngut ki khynnah MBBS. Ïa ka pisa paidbah kaba khraw ba la pynlut ha katei ka projek dei ban pynkylla sha ki jaka pule na ka bynta ki samla jong ka Meghalaya khlem da pynslem shuh.
U Commissioner bad Secretary u la pynskhem ba ka thong ba kham hakhlieh tam jong ka Sorkar ka long ba ki khynnah skul bad ki nongshong shnong jong ka jylla ki dei ban ïoh jingmyntoi bakhraw tam na Tura Medical College.
U la bynrap ruh da kaba ong ba ki shuki thung kam lane pule (quota) jong ka jylla kan long ha kajuh ka bai skul bad ka Shillong Medical College, kata ka long ?33,000 shisnem. Ka Tura Civil Hospital, kaba kan pyndonkam kum ka hospital ïa kiba shitom lane ban hikai, kan ïai bteng ban synshar da ka sorkar. Ka Academic bad Administrative Block ha Doldagre kan ïai sah hapoh ka jinglong trai ba 100% jong ka Sorkar.
Ha katei ka jingïalang, la don ka Dr Rezina Ch Marak, MCs, Joint Secretary, Health and Family Welfare Department and Chairperson, Manpower Assessment Committee, Dr. Lumrilyne M Umlong DHS (MI) Dr Carolinda Ïangrai, DHS (MCHRFW), Dr Baladalin Lyngdoh, DiES (MER, Dr J B Sangma, MS, Tura Cival Hospital; Dr. B Momin, MS, Tura MCH Hospital, bad ka Dr. Nanitha R. Marak, District Tuberculosis Officer, TB 1Hospital, Tura, katkum ka jingthoh na ki lad pathai khubor ba la pynmih da ka Under Secretary sha ka sorkar Meghalaya bad ka tnad ka koit ka bad ka bha ka miat ki paidbah.