Plie paidbah u Bah Sanbor ïa ka Iing Seng jong ka Seng Khasi ba la shna itynnad bha ha Lumshatsngi

Shillong, Risaw 11 : Ka la long ka sngi kaba kyrpang ïa ka Seng Khasi Ri-Raid Laban, ha kaba la plie paidbah ïa ka Iing Seng (Cultural Complex) kaba shna itynnad bha ha ka jinglut kaba kot 9 klur tam ha Upper Kench’s Trace-Lumshatsngi, Laban ïa kaba la bei tyngka da ka North Eastern Council (NEC).
Ïa kane ka Iing Seng la plie paidbah ha kane ka sngi Saitjain da u Myntri ka tnad Arts and Culture ka Sorkar Jylla ba dei ruh u MLA ka South Shillong, u Sanbor Shullai, u ba dei u radbah ba la pynurlong ïa kane ka projek kaba kongsan tam jong ka Seng Khasi ha ka thain.
Ha kane ka sngi, la donlang u Secretary ka NEC, u Satinder Kumar Bhalla, bad u Adviser, u Richard J Lalnunkima nalor u President ka Seng Khasi Seng Kmie Rangbah O Pyngrope, u Bah Ioster Sun President ka Seng Khasi Ri Raid Laban, ki Rangbah Shnong na ki shnong bapher bapher, ki paidbah kiba dang bat ïa ka niam tynrai bad kiwei kiwei.
Ha ka jingïalang plie paidbah, u Bah Sanbor ryngkat ki ummat u la ong ba ka mynsiem ka dap da ka jingkmen kaba khraw ban ïohi ba khatduh la lah ban pyndep ïa kane ka jingtei kaba u la ïakhun tyngeh ban pynurlong. “Kane ka dei ka projek kaba don ha ka dohnud jongnga, namar ka Seng Khasi kaba bud ïa ka niam tynrai, kam pat don la ka jong ka jaka kyntang,” u la ong.
U la ong ba mynta u lah ban sngewkmen ha ka jingim jong u namar ka Seng Khasi ka la ïoh ïa la ka jong ka jaka kyntang. U la pynpaw ruh ba wat ha ki sngi ba khatduh jong ka jingim jong u, un ym don jingsngewsih shuh namar u la lah ban pyndep ïa kane ka kam.
U Shullai u la ai khublei ïa ka Sorkar Pdeng, ka Sorkar Jylla bad baroh kiba la noh synñiang ban pynurlong ïa kane ka project. U la ai khublei kyrpang ïa u Myntri Rangbah ka Jylla, u Conrad K Sangma, ïa ki Symbud Myntri Rangbah kata ïa u Bah Prestone Tynsong bad Bah Sniawbhalang Dhar, bad ïa kiwei pat ki Myntri Sorkar bad ki ophisar.
U la ai jingïaroh ruh ïa ka MTDC bad ki engineer jong ka kiba la trei lang bad ki nongkitkam ka Seng Khasi ha ki kam bapher bapher, kynthup ïa ka jingpeit bniah ïa ka jaka.
Haba kren halor ka jingïatylli hapdeng ki jaitbynriew bad ki niam, u Bah Sanbor u la pynpaw ba ka Laban ka dei kawei na ki jaka kaba don bun jait ki jaitbynriew bad ki jait niam lada nujor bad kiwei pat ki bynta jong ka jylla. U la ong ba ki longshuwa manshuwa jong ki nongshong shnong ki la hikai ïa ki ban im lang kum ki para marjan, da ka jingieid bad ka jingburom iwei ïa iwei pat.
“Watla ki don ha ki jait niam bad ki jaitbynriew bapher bapher, hynrei ki im ha ka jingïatylli bad ka jingsuk,” u la ong da kaba bynrap ba baroh ki jingngeit niam ki hikai ïa ki briew ban ieid, ban burom bad ban im ha ka jingïasuk.
U la kyntu ïa ki paidbah ban bud ïa ka jinghikai jong ki kmie ki kpa, da kaba kynmaw ban duwai ha ka step haba khie na thiah bad ha ka miet shuwa ban thiah.
Ha kaba kut jong ka jingïalang, ka Seng Khasi Ri-Raid Laban ka la pynkup burom ïa u Shullai da ka ‘Jainspong’ tynrai bad ki jingkynmaw burom, kum ka dak jong ka jingsngewnguh ïa ka bynta jong u ban pynurlong ïa kane ka project kaba kongsan ïa ka kynhun niam tynrai.