Ka dei ka jingdie duh ïa ki jaka ym kata ka jingïapynbeit pud kumba kam ka sorkar MDA ong u President ka VPP

Shillong, Risaw 11: U President jong ka Voice of The People (VPP) u Bah Ardent Miller Basaiawmoit u la ong ba ka jingïapynbeit pud da ka sorkar MDA ïa ki 6 tylli ki jaka ba don jingïakajia na ka liang ka VPP kam lah satia ban pdiang naba kane kam dei satia kata ka jingïapynbeit pud hynrei kadei pynban ka jingdie ïa kitei ki jaka.
Ïa kane u nongïalam ka VPP u la kynnoh ha ka jingïakren bad ki lad pathai khubor ha ka sngi saitjaiñ ha ka jingïalang ki nongkyrshan ka VPP ha Polo ha kaba da ki hajar ngut ki nongkyrshan ki la wan ban ai mynsiem bad kitbok kitrwiang ïa u kyrtong ka seng u Dr. Batskhem Myrboh u ban ïakhun ïa ka elekshon shiteng samoi sha Lok Sabha na Shillong Parliamentary Constituency u ba mihpli ha ka jaka jong u (L) Dr. Ricky AJ Syngkon uba la khlad noh na kane ka pyrthei.
U Bah Ardent u la ong ba ka kum ka party u la ong ba ka party ka la ju kren na ka por sha ka por halor ka jingeh kiba sah ha khappud bad ka jylla Assam kum ka Mawsikar bad Lapangap ban kyrshan ïa ki jingdawa jong ki ban pynbeit ïa u pud u sam katkum ka jingkwah jong ki.
“Ngi la kren hapoh Ïingdorbar thaw aiñ ka jylla halor kane ka jingeh ba ngim lah satia ban pdiang satia ïa kane ka jingïapynbeit pud hapdeng ka jylla Meghalaya bad ka Assam ha ki 6 tylli ki jaka ba ïakajia pud naba kane kadei ka jingdie pynban ïa kitei ki jaka,” ong u nongïalam ka VPP haba kren sha ki lad pathai khubor.
U la ong ba ka seng kan ïeng tylli beit bad ki nongshong shnong kiba sah ha ki khappud halor ki jingeh ba ki mad manla ka por bad watla kane ka poi ne em sha ka thong hynrei ka party kan ïeng beit ha la ka nongrim ban ïeng lang bad ki nongshong shnong jong kine ki thaiñ.
Ha kawei pat ka liang haba kylli halor ka jingkam beit jong u MLA ka North Shillong u Bah Adelbert Nongrum ba u dang ïai don bad ba u dang dei hi u MLA jong ka Voice of the People Party (VPP), u President ka VPP u la ong ba u Bah Rit u dang dei hi u MLA jong ka VPP tangba u dei pat u MLA ba la shah sospon.
Lah ban pynkynmaw ba dangshen u MLA ka North Shillong u Bah Adelbert Nongrum u la pynbna ba u dang ïai don hi bad ka party VPP naba ka jingshah sospon jong u ka la long kaba khlem ki rukom bad ki kyndon treikam jong ka seng.