Dawa ka KSU ban weng noh ïa ki pandal kiba pynwit ïa ki surok PWD, kdew ïa ka jingthut jong ki paidbah

By Mawphor Editor On Oct 12, 2026

Shillong, Risaw 11 : Ka Khasi Students’ Union (KSU) ka la kyntu ïa ka Public Works Department (PWD) ban weng noh ïa ki pandal bad kiwei pat ki jingtei shipor kiba la shna harud ki surok PWD, da kaba ong ba kine ki jingtei ki pynwit ïa ka ïaid ka ïeng bad buh jingeh ïa ki paidbah.
Ha ka shithi ba la phah sha u Chief Engineer, PWD, ha ka sngi Palei, ka seng ka la ong ba la phah ïa kane ka jingujor hadien ba la ïoh ïa ki jingujor kiba bun na ki paidbah na ki bynta bapher bapher.
“Ïa kane ka shithi la phah hadien ba la ïoh ïa ki jingujor kiba bun na ki paidbah halor ka jingkhanglad bad ki jingeh kiba mih na kine ki jingtei ha ki surok PWD. Kine ki jingtei ki la wanrah ïa ki jingeh ha ka jingïaid beit ïaid ryntih jong ki kali bad ki nongleit nongwan, khamtam ha ki jaka ha kaba ka surok ka la khim lypa,” la ong ka KSU.
Haba pynpaw ba ka sngewthuh ba lah ban shna ïa kine ki jingtei shipor na ka bynta ki jingïalang bad ki jingthmu bapher bapher, ka seng ka la ban jur ba ym lah pat ban ïapein ïa ka jingshngaiñ jong ki paidbah.
“Ka long kaba donkam ban pynthikna ba kine ki jingtei kin ym khanglad ïa ki surok paidbah lane ktah ïa ka jingshngaiñ bad ka jingbit jingbiang jong ki paidbah,” la ong ka KSU.
Ka seng ka la kyrpad ïa ka PWD ban pynthikna ba la bud ïa ki kyndon bad ki jingbthah kiba biang shwa ban ai jingbit ban shna ïa kum kine ki jingtei ha ki surok paidbah.
“Ha kaba ïadei bad ki jingujor kiba la wan man ka por, ngi kyrpad ïa ka ophis jong phi ban sngewbha peit bniah ïa kane ka kam bad shim ïa ki sienjam kiba donkam ban weng ïa ki pandal bad kiwei pat ki jingtei shipor kiba khanglad ïa ki surok PWD, bad ban pynthikna ba la bud ïa ki kyndon kiba biang shwa ban ai jingbit ïa kum kine ki jingtei ha ki surok paidbah,” la ong ka seng.
“Ngi kyrmen ba ka bor ba dei khmih kan shim ïa ki sienjam kiba donkam kham kloi katba lah, na ka bynta ka jingmyntoi paidbah, khamtam ban pynthikna ïa ka jingshngaiñ, ka jingbit jingbiang jong ki paidbah bad ka jingpyndonkam hok ïa ki surok paidbah,” la bynrap ka KSU.