Leit ïakynduh ki nongïalam ka HYC ïa u SDO ba trei torti u kontraktor ïa ka surok Nongshillong-Jakrem

Mairang, Risaw 09: Ka surok Nongshilong-Jakrem ka dei kaba dang shu maramot bad pynbha dang tang kumba phra bnai eiei hynrei na ka daw jong ka jingtrei torti jong u kontraktor katei ka surok ka la sdang ban jot ban pra ha kiba bun ki bynta. Nalor kata ïa ka jingsiang rong dang dep pytrei tang kumba lai kilomitar eiei hynrei kaba kham bun pat ka dei kaba dang sah kaba dang shu siang tang u mawria.
Kumta na ka liang ki nongïalam ka Hynñiewtrep Youth Council Parïong area hadien ba ki la ïohi ïa ka jingsdang jot bad sdang pra jong ka surok ba dang shu dep siang rong ha kine ki khyndiat bnai ba la dep ki la leit ban jurip bad la lap ba ki don bun ki bynta ha katei ka surok kiba ka jingsiang rong ka long kaba torti haduh katta katta bad ka rong ba la siang ka la sdang ban pra bad mih khyndew. Kumta halor katei ka jingbym biang bad ka jingtorti jong ka jingsiang rong ki nongïalam ka seng ki la hiar sha Nongkasen ban leit ïakynduh ïa u Sub Divisional Officer ka tnad PWD bad ban kyrpad ïa u ba un bthah ïa u kontraktor ba u dei ban moramot ïa kitei ki bynta ba ka rong ka la pra bad ki bynta ba la pei satang ki mawria.
Ki nongïalam ka seng haba ïakren bad u nongthoh khubor hadien ba ki la wan phai na ka jingleit ïakynduh ïa u Sub Divisional Officer ka tnad PWD ha ka ophis trei kam ha Nongkasen ki la ong ba ka jingleit ïakynduh jong ki ïa utei u ophisar ka long kaba seisoh ha kaba u la kular ba un sa shimkhia ïa ka kam bad bthah ïa u kontarktor ba un moramot noh ïa ki bynta ba la jot ha katei ka surok.
Ha kajuh ka por ki la ong ba ha kaba ïadei bad katei ka jingkyrpad ki la aiti ruh da ka jingthoh khnang ba utei u ophisar un kham pynkloi ban leh ïa kaba donkam. Ki la ong ruh ba kaba ithamula ka long ba ka jingsiang rong ïa katei ka surok ka longthik kumba tah lip stick ki kynthei namar la shu pynïong tang najrong hynrei tang shi ksai ym don ka khyndew khleh mawria suda bad dei na katei ka jingtrei torti ba ki nongtrei kiba leit phai ynda jan miet ha ïng kim pat poi ka surok ka la da jot.
Ha kajuh ka por ki nongïalam ka seng ki la pan jingshai ruh na utei u ophisar ha kaba ïadei bad ka surok na Parïong sha Peiñlang kaba dang shu dep siangrong ha ki snem ba la dep hynrei mynta ka la sdang ban jot bad pra bad halor ka jingpan jingshai jong ki utei u ophisar u la kular ba un sa peit bniah ïa ka tender agreement jong ka sorkar bad u kontraktor bad lada ka por ba u kontarktor un maramot kam pat kut un sa bthah ïa u ba un maramot noh ïa ki bynta kiba dei ban maramot.